Vawiin khan Mizoram Science, Technology & Innovative Council (MISTIC) hnuaia Mizoram State Climate Change Cell leh DC Office Champhaite tangkawp buatsaihin Govt Champhai College Multipurpose Hall-ah Sik leh Sa inthlak danglam zel zirhona ‘Climate Change Awareness Programme’  neih a ni.

Champhai Bawrhsap Dr Naveen Aggarwal, IAS chuan he hun hmang tura kalkhawmte thinlung taka a lo lawm thu sawiin, Sik leh Sa lo danglam ta zel chu khawvel kalphung mai piah lamah a tam zawk chu mihringten kan siamchawp a ni, a ti a. Sik leh Sa inthlak avangin thlai chin dan leh hunte a lo danglama, rannung  atanga natna kaitheihte a lo hluar zel avangin fimkhur angaih thu a sawi a. Ram tih kan nasat avang leh tul lo taka boruak tibawlhhlawh zawnga kan chet avangin   sik leh Sa a lo inthlak danglama, a ven leh dawnsawn  kawngah inpuahchah that angai a ni, a ti a. Tun lai kan buaipui em em Sik leh Sa inlumlet dan zirtrirna pe tura lokal department hotute leh mithiamte chungah lawmthu a sawi a, Champhai mipui he hun chhimtute chu hun tha leh hlawkpuiawm tak nei turin duhsakna a hlan a ni.

He hunah hian Dr R.K Lallianthanga, Chief Scientific Officer & Member Secretary, MISTIC, Directorate of Science and Technology chuan thusawiin,  Sawrkar laipuiin Sik Leh Sa inthlak danglam chak tak  a ngaipawimawh em em a, a enkawltu tur department hmingah pawh Ministry of Environment, Forest & Climate Change ti a vuah anih thu a sawi a. Himalaya region a State hrang hrangah nasa taka tanlak anih thu sawiin, Mizoramah pawh Sik leh Sa danglam chak tak venna kawngah zirtirna kalpui thin a ni a, mitinten mahni phak tawka mawhphurhna  kan hlen theuh angai a ni, a ti a. Loneitute tan buh leh bal leh thlai tharchhuah kawngah line department-te nena tangkawpa nakin hun ngaihtuah chunga hmachhawp siam thiam angaih thu a sawi.

Chief Scientific Officer chuan Champhai District chu Mizo zinga mi challang tak tak lo chhuahna leh theihna sang tak nei anih avangin Sik leh Sa inthlak venna kawnga mipuite zirtirna leh hmalakna kawngah a thawhhlawk hle theih dawn thu sawiin, Sik leh Sik leh Sa inthlak danglam zel chu khawvel huap nimahse mahni theihna zawn theuha tanlak chu mintinte mawhphurhna a ni, a ti a. Mizoramah ngei pawh khaw lum a zual zel  thu tarlangin, District hrang hrangahte khaw awm dan chipchiar zawka record-na  tur hmanraw tha zawk bun tura hmalak tum anih thu a sawi a. He hun rawn hmang tura kalkhawmte chu thahnemngai taka zirtirnate ngaithlaa, hriatchian duhte zawtfiah tur leh zirtirna a taka hmang tangkai tum turin a chah nghal a ni.

He hunah hian Sik leh Sa inthlak danglam chungchangah zirtirna hrang hrangte ngaihthlak a ni a. Pu Lalthanpuia, Scientist B, Mizoram State Climate Change Cell-in ‘ Khawvel Huapa Climate Change Chungchang’ tih thupui hmangin zirtirna  a pe a. Dr James Lalnunzira Hrahsel, Project Scientist, Mizoram State Climate Change Cell hnen atangin ‘Mizoram Chhunga Climate Chenge Chungchang’ tih   zirtirna ngaihthlak a ni bawk. Zirtirna neih zawh hnu hian zawhna leh chhanna hun hawn niin, mithiamten zawhna te an chhang a ni. He programme hi Pi Esther Leihang, SDC Champhai chuan lawmthu sawina neiin  a khar a ni.

Vawiin Climate Change Awareness Programme hun hmannaah hian Sawrkar hnathawk, NGO aiawh, VC leh Zirlaite an tel a ni.