Khawvel hmun dangte rualin vawiin khan Champhaiah World Malaria Day-2019 pualin hun I&PR Auditorium, CHANEM Building-ah hman a ni. He hun Champhai District Vector Borne Disease Control Programme huaihawtah hian ‘Zero malaria starts with me’ tih chu thupui atana hman a ni.

He huna thusawitu  Dr. R.Lianmawia, Champhai District Malaria Officer chuan kum 2004 hmalamah Champhai District-ah Malaria vei thahnem tak hmuchhuah thin an nih thu sawiin,  department lama thawktute   leh mipuite tanrualna avangin tunah chuan Mizorama District zawng zawng zinga Malaria tlemna ber kan ni thei chu thil lawmawm tak anih thu a sawi a.  Kum kalta 2018-ah Champhai District chhungah Malaria vei mi 5 chiah hmuh chhuah an nih thuleh tumah Malaria vanga thi an awm loh thu tarlangin, Kum 3 chhung Champhaiah Thosi hlo kah a ngaih tawh loh thu leh Actual Parasitic Index (API) pawh 0.03 chauh a nih tawh thu a sawi a. Dr. R Lianmawia chuan Malaria um bona tura pawimawh chu thosi inseh tir loh a nih thu sawiin, "Thosi pian theihna hmun inleh avela tui tlin theihna awm tir loh te, Thosilen tha tak zarte a ni" a ti a, Malaria natna avanga nunna chan an awm lohna tura tanrualpuiah kalkhawmte chu a sawm bawk a ni.

He hunah hian  Malaria dona kawnga Short Video Clip insiam siak lawmman sem a ni a, Hospital Veng Kohhran Hmeichhia Estheri Group-te chu pakhatna an ni a. Lalruattluanga Khawzawl chu pahnihna niin Lalramsanga Khualsim leh Khalthang Arts-te chu lawmman pathumna dawngtu an ni a.   Programme hman zawh hian Free Clinic buatsaih nghal a ni bawk.

Programme zawh hnu hian Non-Communicable Disease (NCD) nena tangkawpin CHANEM Building Ground Floor-ah World Malaria Day pualin Mass Blood Collection leh Free Clinic neih a ni a,  mi 56 hnen atanga thisen lakte endiknaah Malaria hrik hmuh a ni lo a ni. Vawiin World Malaria Day 2019 puala hun hmannaah hian Sawrkar hnathawk, Chanchinbumite, NGO aiawh  leh Zirlaite an tel a ni.