Vawiin khan DC Conference Hall Mamit-ah District Level Coordination Committee (DLCC) chu Fostering Climate Resilient Upland Farming System in the North East (FOCUS MIZORAM) chungchang ngaihtuahin an Chairman Dr. Lalrozama, IAS, Mamit District Bawrhsap ni bawk hovin thutkhawm a ni.

Meeting-ah hian Dr. Lalrozama chuan Aspirational District kan nih angin kan District chhungah hmasawnna tur tam tak kan la nei a. Department hrang hranga thawktute chu kan hmalakna reng rengah inpekna tak tak nen a tha thei ang bera kan thawh chu kan mawhphurhna a ni a. Hlawh hmuhna atan ringawt thawk lova mipui rawngbawl kan ni tih kan hriatreng a tul a ni a ti. Mizoram District 4 zingah kan District chu Project FOCUS Mizoram atan thlan kan ni chu lawmawm a tih thu sawiin kan District hmasawnna atan tangkai thei ang bera kan hman thiam a pawimawh a ni a ti.

Pu C. Lalengzauva, District Project Manager, Mamit chuan he Project chungchang tlangpui Power Point Presentation hmangin a sawifiah a. He Project hi District pali, Champhai, Kolasib, Serchhip leh Mamit-ah kalpui a ni dawn a. Block 11 huamchhunga khaw 272 tuamchhuak tur niin chhungkaw 64500 leh mihring 322500 in he Project kaltlang hian hlawkna an hmuh theih beisei a ni. Mamit District chhung bikah khaw 74 a mihring 82581 te'n he Project kaltlang hian hlawkna an hmuh theih beisei a nih thu a tarlang.

He Project hi Kum 2018 khan International Fund for Agricultural Development ( IFAD) nen inremna siam niin Project hi Kum 2024 a zawh tura ruahman a ni a. He Project Nodal Agency-ah Department of Agriculture chu ruat niin a pumpuia Project Cost hi Rs 539.272 Crore tur niin tarlan a ni. He Project-in a tum ber chu chhungkaw 64500 talin kuthnathawh atanga sum dehchhuah an tihpun leh sik leh sa nghawng thei lo, kuthnathawh a eizawnna ngialnghet neihtir a nih bakah kumtina kan lo neihna sawn lova a hmun ngaia thil tharchhuah dan kawng ngaihtuah a ni.

He Project hnuaiah hian lo nei mite'n kan thar chhuah tlangpui Buh, Chhawhchhi, Vaimim, Be, Sawhthing, Aieng, Hmarchate bakah Nursery tihchangtlun nan te, ran vulhna kawngah leh a hralh chhuahna tur bakah a panna kawng sialte a huam dawn a ni.

Vawiin Meeting-ah hian PD, DRDA, DAO, District Soil Conservation Officer, Settlement Officer, BDO West Phaileng bakah DHO Tuidam, DFO Mamit, AH & Vety Officer aiawhte bakah Jt. VC Chairman-te an an tel a ni.