Vawiin khan District Vector Borne Diseases Control Programme hmalakna in St.Joseph’s Parish hall Kolasib ah ‘Zero Malaria Starts With Me’ tih thupui hmangin World Malaria Day hman ani.

He hunah hian Kolasib Chief Medical Officer Dr.Lalhlimpuia Sailo chuan Kolasib District chu faina leh thianghlimna kawngah nasa takin hma a sawn a, chu chuan natna chi hrang hrang umbo na kawngah kawngro a su hle a ni tiin Malaria natna vei awm zat pawh Kolasib District ah a kum bi telin an tlahniam zel ani ati. CMO chuan malaria natna laka inven bakah a umbo hna chu keimahni kutah theuh a in nghat ani tiin Malaria pu darh tu thosi laka inven nan in leh a chhehvel vawn thianglim a tul ani a ti bawk. 

Senior Medical Officer Dr.RK Lalthlamuana chuan Malaria dona kawnga Kolasib District hmalakna chu thil chhinchhiah tlak tak a nih thu sawiin Kum 2016 khan Khawsik mi 29,445 te thisen exam ah mi 230 in Malaria natna an vei a, kum 2017 a Khawsik mi 18,886 thisen exam ah mi 116 in malaria natna an vei a, kum 2018 ah khawsik mi 15,154 thisen exam ah mi 36 chauhin Malaria natna an vei thu a tarlang a, mihring awm zat atanga malaria kai zat tehna Annual parasitic Incidence (API) chu kum 2016 a 2.6 ni thin chu kum 2018 ah 0.4 ah a tlahniam a, kum hnih chhungin Kolasib District ah Malaria avanga thi an awm loh thu a tarlang bawk.

SMO chuan Malaria natna laka invenna pawimawh tak chu In leh a chhehvela tui tling awmlo tura hmalak ani a, tuitling chuan Malaria natna pu darhtu Thosi nu ‘anopheles’ tan inthlahpunna remchang a siamsak a, chu chuan Malaria vei te thisen a zukin midangah an thehdarh thin a ni a ti, hemi bakah hian mut hmuna thosilen uluk taka zar te leh thosi huat chhit, hal leh inhhnawih te ngaih pawimawh a tul ani tiin chhungtin ten tan kan lak a ngai thu a sawi a ni.

Kolasib a World Malaria Day hmanna ah hian Malaria laka inven dan tur kawng hrang hrangte chu zirna run pariat atanga kalkhawm zirlai naupangten lem inchan siakin an entir a, pakhatna RMSA H/S Vengthar chuan lawmman pawisa fai cheng 7000/- an dawng a, pahnihnaSaidan Secondary sikul chuan lawmman pawisa fai cheng 5000/- dawngin Pathumna Chawnghmingliani Memorial High sikul chuan cheng 3000/- an dawng a, lemchan intihsiakna a sikul tel te chuan participation prize cheng 2000/- theuh an dawng bawk a ni.