Vawiin khan Chief Minister Pu Zoramthanga kaihhruaiin Parking House Committee for PAHOSS ( Parking House Support Scheme) chu CM Cabinet Meeting Room ah thukhawmin hnathawh thlirhona leh hmalak zel dan tur an sawiho.

Khawpui chhung kawng tawt lutuk tiziaawm a, garage neihloh avanga harsatna tawkte leh parking area awmlai in a dawl zawhloh avanga harsatna te sukiang tura hmalakna PAHOSS hi kumin February ni 6 khan tlangzarh a ni a. He scheme hnuaiah hian in dinglai emaw a sakna tur hmun ruak, kawpui dung an a  nei te chuan motor parkna "parking house" ah an siam duh chuan Sawrkarin tanpuina a pe thei dawn a. Tanpuina pek zat hi lirthei LMV pakhat zelah emaw 2-wheeler paruk zelah cheng nuai 1 a ni ang a. Parking fee rate hi AMC in a tuk ang a, Parking House neituten fee hi an tel vek thung dawn a ni. PAHOSS puihna dawng thei tur hian a tlem berah lirthei LMV (2.5x4.5 m) panga emaw two-wheeler 30 tal len theihna hmun neih a ngai a. In chu permanent structure tur a ni a, bang feet 5 tal a sang a nei tur a ni bawk. Tanpuina hi installment thum a pek tur a ni. A hma atanga parking atana lo hman tawh sa tan erawh PAHOSS puihna hi pek theih a ni dawnlo.

Vawiin meeting-ah hian Aizawl area pali - North, South, East leh West atanga dilna lut hrang hrangte chu thlirho niin, a vaiin dilna 419 a lut tawh a. PAHOSS inkaihhruaina in a sawi te an tlin em tihte enfiah a ni. Meetingah hian khawpui chhunga traffic tawt zualna thin - Chanmari to Dawrpui, Sikulpuikawn to Kulikawn leh Khatla te chu ngaihpawimawh hmasak theih ni se tia sawi a ni bawk.

Vawiin meeting-ah hian Pu P.C. Lalhmingthanga, AMC Mayor, Pu Vanlalchhuanga, Finance Secretary,  Pu LH Shanliana, IGP, Er. Lalsawmvela, PWD Chief Engineer, UD&PA Director Pu Joseph H. Lalramsanga leh officer dangte an tel a ni.