Vawiin khan Mizoram State Cooperative Union (MSCU) leh National Cooperative Union of India (NCUI), New Delhi tangkawp te chuan I&PR Auditorium, Chanem Building-ah Integrated Cooperative Development Projects (ICDP) dawng Cooperative Society-te tan District Level Cooperative Seminar a buatsaih.

He hunah hian Pu Lianthangpuia, President MSCU chuan thusawiin eizawnna tham loh Society chu din loh ngam tur a ni, a ti a. Society hi a phur nazawng din chi a nih loh thu leh, kan khua a zir leh kan awmna hmun a zirin society thlan kan thiam tur a ni a; Eng society pawh din ila member ten a zar kan zo theih ang tih ngaihtuah chungin kan din tur a ni, a ti. Society kan hlawhchham pui fo thin hi kan zir chian a hun tawh a, kan ngaihtuahna kan thlak a, tih tak thlaka kan beih a tul tawh a ni, a ti a.

Pu Lianthangpuia chuan ICDP sum lo kal hi society member ten a zar an zo ngei theihna turin awmze nei taka kalpui tur leh sum peipung ngei tura theihtawp chhuah turin kalkhawm te chu a chah a ni.

He hunah hian Pi Rothangliani, FEO leh Pi TC Lalchawimawii, FEO ten an telpui a. Cooperative Society 40 atangin mi 73 ten he seminar hi an hmang a ni.