Vawiin khan Kolasib DC Pu H. Lalengmawia, IAS hovin National Highway-54, Kolasib leh Kawnpui inkara kawng siam(repair) mek chungchanga Bualpui Village Council ten hnathawh quality tha tawk lo nia thu an thlen sawiho turin PWD aiawh te, he kawng repair hnathawktu Sunshine Overseas Pvt. Ltd. aiawhte leh Bualpui leh Kawnpui VC Member ten DC Office Chamber ah meeting an nei.

Pu H. Lalengmawia chuan NH-54 hi Mizoram lifeline anih avangin he kawng siam leh repair quality chu a ngaipawimawh a, engtin nge hna tha zawk kan neih theih ang tih sawiho a, a fuh lo lai leh tha lo lai niawma langte ti tha turin Village Council te thu thlen chu ngaipawimawha, meeting hi koh a ni, a ti a. Village Council te thil hmuh dante zawtin Sunshine Overseas Pvt. Ltd. aiawhte  chu hna an thawh dan leh an hmaraw hman dante a zawt a. DC chuan Sunshine Overseas Pvt. Limited aiawhte chu an thil tih dik loh te ti nawn lo tura hriattirin a tha thei ang bera he kawng hi siam turin Sawrkar leh mipui an beisei a ni, a ti a. PWD lam pawhin he hna hi uluk leh zuala an vilpui leh an enpui tur thu an sawi bawk a ni.