Vawiin khan Directorate of Science & Technology (DST) leh District Education Office tangkawpin SSA Recreation Hall, Lunglei-ah Lunglei leh a chhehvela High School Science Teacher-te tan 'Sensitization Workshop on Basic Sciences' buatsaih a ni.

Workshop hawnna kaihruaitu Pu F. Lalramchuana, Scientific Officer, DST chuan kalkhawmte lawmna thusawiin Workshop buatsaihna chhan leh tumte a sawifiah a. Pu PC Lallawmzuala, Dy. District Project Co-Ordinator, RMSA chuan programme a hawnnaah he Workshop hi High School Science Teacher-te intuaitharna nan leh zirlaite hnena a bul atanga chiang leh zuala an zirtir theih nana Directorate of Science & Technology hmalakna a nih tih a sawi a. Zirtirtute chu zirnaa an inpek chuan zirlai naupangte pawhin hmasawnna leh phurna an nei dawn a ni, a ti. Lunglei District pawh zirnaah hma a sawn zel a, chuvangin zirtirtuten an theihna zawng zawng nen zirna tihmasawn nan bei zel turin a chah. 

Sensitization Workshop-ah hian Resorce Person Lalhmingliana Hnamte, Associate Professor, Department of Chemistry, Gov't. Zirtiri Residential College-in Chemistry Subject-ah zirtirna a pe a; Pu Lalhmachhuana, Physics Teacher BHSS, Serkawn-in Physics Subject-ah chungchang a sawizau bawk a; Dr.Lalfakawma, Associate Professor, Department of Botany, Gov't. Lunglei College chuan Biology Subject chungchang a zirtir bawk a. Chawhnu lamah heng subject 3 chungchang zirhona leh sawihona neih zui a ni.