Vawiin ah khan College of Veterinary Sciences & Animal Husbandry, Selesih campus ah ni 3 awh tur, CAU Regional Agri-Fair 2016, Central Agricultural University, Imphal (CAU) in buatsaih chu Mizoram Governor Lt.Gen(Rtd.) Nirbhay Sharma chuan a hawng.

Regional Agri-Fair 2016 ah hian Tamilnadu leh hmarchhak state zawng zawng te an tel a. Dawr 36 hawn niin heng dawr ah te hian loneitu leh kuthnathawktute mamawh hmanrua te, ran vulh chi hrang hrang,thei chi hrang hrang, thlai rah chi hrang, huanthlai enkawl kaihhruaina lehkhabu, pangpar, thawmhnaw leh eitur te lei theih a chhawpchhuah a ni.

Hmarchhak bial huap Agriculture Kut hawng tu, Governor Lt.Gen(Rtd) Nirbhay Sharma chuan Mizoram a thei leh thlai kan enkawl dan chu Organic farming a ni sa reng tawh a ti a. Organic Farming huang chhunga sumdawnna ah 60 Billion US Dollar a chet mek thu tarlang in chutah chuan India in 1% chiah chanvo a neih thu a sawi a. Buhhmun siamna atana remchang tam lo mahse Mizoram leilung, sik leh sa te chu Horticulture hnuaia thlai leh theirah chitin reng in a ngeih em em a nih thu tarlang a. Heng thlai te hi Mizo kuthnathawktu te kalpui mek Organic farming hnuaiah awmze nei zawk kalpui a nih chuan a hlawk thlak hle ang a ti a. Hnimhnah hring tamtak ran chaw atana tha tak tak te chhawr tangkai a ni tawk lova a hriat thu sawiin thlai huan siam, ranvulh leh sangha khawi kalkawppui chu uar zawka inkawhhmuh a ngai a ni a ti. KVK ah mithiam te rawn tur tam tak an awm a, chung mithiam te puihna hnuaiah Central sawrkar hnuaia hmalakna hrang hrang : RKVY, ATMA leh NFSM chu sawt zawka kalpui a nih theih thu a sawi a. Agriculture leh Vety mithiamte tana chona lianber chu an thiamna te kuthnathawktute chhawr tangkai tir a ni tiin Regional Agri-Fair 2016 rawn chhimtu mithiam rual te chu a chah a ni.

Thusawitu dang, Pu R.Lalrinawma, Deputy Speaker chuan Mizoramah Kut pawimawh tak CAU in a buatsaih chu ropui a tih thu sawiin lehkhathiam hnathawhtur zawng mek te tan tlawh ngei ngei chi a nih thu a sawi a. Regional Agri-Fair 2016 a dawr atang te hian remhriatna nasa tak Mizo thalai ten an zirchhuah a tul a ni a ti. CAU Vice Chancellor hnenah Mizo thalai tam zawk Vety College leh Horticulture College ah hnathawk atan lakluh ni se a lawm awm tur thu a hrilh a. Vety College chu Mizoram tan rohlu a nih avangin a panna kawng enkawl chhunzawm tak loh siam that a nih theih nan thuneitute a lo biak rawn tur thu pawh a tarlang a ni.

Professor M. Prejit Singh, Vice Chancellor, CAU, Imphal pawh in thusawina hun hmangin Mizo mipui te thawhpui nuam a tih thu sawi a. Mizoram chhunga Central University college thaber pawh College of Veterinary Sciences & Animal Husbandry, Selesih a than zel nachhan bulpui ber pakhat pawh Mizo mipui tawiawmna bakah remna leh muanna vang a ni a ti. Horticulture College, Thenzawl pawh kum in July thla chhung ngeiah hawn a nih theih nan leh zirlai ten class an tan theih na turin hma lak mek a ni a ti.

Dr.D.Kathiresan, Dean, College of Veterinary Sciences & Animal Husbandry, Selesih in report a pek dan chuan nikum khan an college hian JRF Exam ah India rampum huap ah pakhatna an hauh a. Tun dinhmun ah All India Vety College ranking ah 6-na hauh mekin CAU, Imphal hnuai ah college lianber an ni mek a ni. College of Veterinary Sciences & Animal Husbandry, Selesih hian Department 14 a awm mek a, heng zinga department 6 ah Phd a zir theih a, department zawng zawngah Post graduate degree course a zir theih bawk a ni.

Regional Agri-Fair 2016 hawnna inkhawm ah hian CAU Agri Fair 2015-16, CAU Farm Magazine, CAU research report 2014-15, Booklet on pig Farming, Booklet on Backyard poutry farming, Mizoram a vawkvulh hlawhtlinpui na chanchin leh chuktuah huan enkawl dan Video CD a siam te Governor chuan a tlangzarh nghal a. Governor leh Deputy Speaker te chuan kuthnathawktu te hnenah bungrua, thlai chi, ran note, ar note leh sava note vulh tur an sem nghal bawk a ni.