2912/2023-2024

Champhai the 2^nd December, 2023 - Mizoram Legislative Assembly Inthlanpui, 2023-a Champhai District huamchhunga Assembly Constituency pathuma vote tlate chhiar tura ruat Counting Officials te duty na tur chu vawiin khan NIC Building, Keifangtlangah Counting Observer-te hovin Computer hmanga thliarfel (randomize) vawi hnihna neih a ni.

He hunah hian 24 Champhai South AC Counting Observer Pu Krishna Kumar Rawat, Champhai DC & DEO, 24 Champhai South AC RO ni bawk Pu James Lalrinchhana, Champhai Addl DC & 23 Champhai North RO Pu M. Misael, Champhai PD, DRDO & 25 East Tuipui RO Pu Lalrinawma leh official dangte an tel a ni.

Champhai District-a Assembly Constituency pathuma vote tlate chhiar tur hian Counting Supervisor leh Counting Assistant 29 theuh ruat an ni a. Hemi bakah hian vote chhiar enpui tur Micro Observer 36 ruat an ni a. Vote chhiarna atan hian Counting Hall tinah Vote Chhiarna Dawhkan (Counting Table) 8 theuh awmin, Randomization a table nei lo (Reserve) te chuan Postal Ballot a Vote tla leh VVPAT slip an chhiar dawn a. Vawiin Randomization ah hian Counting Official-te duty na tur Assembly Constituency leh an duty pui tur Team te thliarfel a ni a. Vote chhiar ni (December ni 4) zing dar 5 ah Final Randomization neih leh tur niin, hetah hian an duty na tur dawhkan thliar leh a ni ang.

Champhai District-a Vote chhiar endiktu tur Observer-te chu ECI in a ruat fel tawh a. Chungte chu 23 Champhai North AC ah Dr Ranjit Kumar Singh; 24 Champhai South AC ah Mr Krishna Kumar Rawat; leh 25 East Tuipui AC ah Mr Sanjay Kumar te an ni a. Observer te nen hian vawiin khan DC Office, Keifangtlanga Vote chair tura inpuahchahna hrang hrang te an en ho a ni.