No.2745/2021-2022
Aizawl 27th October, 2021 : Vawiin chawhma dar 11 khan Lead Bank Office Champhai buatsaihin Bank kaltlanga sawrkar laipui scheme hrang hranga hamthatna loan leh credit scheme dang awm theite inzirtirna hun ‘Credit Outreach Program’ chu Kahrawt YMA Hall, Champhaiah buatsaih a ni a, he hun hi Credit Outreach Program Chairperson Pi Maria C.T Zuali, District Bawrhsap chuan a telpui a ni.

Pi Maria C.T Zuali chuan thla thum danah Bank leh Line Department hotute nen inrawnkhawmna District Consultative Committee (DCC) neih thin a nih thu sawiin, loneitute, sumdawng leh zirlaite tana hamthatna scheme hrang hrang awmte leh hmalak dante thlirho thin a nih thu a sawi a. Hamthatna awm angte dawng thei turin kan tana sawrkarin scheme a duante kan hriat bel a tul a, hetiang lam thlurbinga inzirtirna hun buatsaih a ni chu lawmawm tiin, loan lak leh credit scheme-te chhawr tangkai theih dan leh bawhzui dan tur Lead Bank Office leh NABARD te thahnemngaihna hmanga buatsaih a ni chu fakawm a tih thu a sawi a ni.

Bawrhsap chuan ram dang atanga ei leh in, nitin mamawh leh hmanraw engemawzat lakluh thin tihtlem a nih theih nan tualchhung thar leh dehchhuah tihhmasawna intodelh tura tanlak a tul thu a sawi a. Thil inthlak danglam ang zela inherrem zung zung thiam, taimakna leh rinawmna neia dingchhuak thei tura hnathawh a tul thu sawiin, ram dang atanga mamawh zawng zawng lakluh vek tum bik lova, mahni kut ke a dinga District intodelh ni thei turin rilru puthmang kan thlak a tul a ni, a ti a. Ei leh in sawngbawl kawngah tun aia hmasawn tura tanlak mek zel a nih thu sawiin, food processing training neih thuai tum a nih thu a sawi a. Hlawhtling turin rinawm leh taima taka thawh a ngai a, dan palzuta awlsam taka sum lakluh aiin eizawnna thianghlim, sum thianghlim lakluh theihna tur chauh ngaihvena hmalak a tul thu a sawi bawk. Kalkhawmte chu tumruhna leh huaisenna, beih hram hramna nun nei theuh turin a fuih a. Credit Outreach Program buatsaih hmanga inhrilhhriatna neih chu uluk taka ngaithla a, midangte hnena hrilh chhawng zel tur leh intodelh nana hmanraw tangkai taka hmang theuh tura duhsakna hlanin Credit Outreach Program chu a hawng a ni.

Vawiina Credit Outreach Program buatsaih hi Pu Jyoti Munna Soren, LDM & Convener, Lead Bank Office Champhai chuan a kaihruai a. Pi H. Lalhmachhuani, DDM, NABARD Champhai leh Pu Rozamliana, Branch Manager, Mizoram Co-operative Apex Bank Champhaite hnen atangin sawrkar laipui scheme pawimawh tak takte leh Bank kaltlanga hamthatna loan lak dante ngaihthlak a ni a. Agriculture Infrastructure Fund, NABARD Scheme, CLSS, PMEGP, Education Loan, Mudra Loan, HFA, KCC Loan, Stand up India leh Scheme pawimawh dangte zirho niin, zawhna leh chhanna hun hlawkthlak tak hman chhunzawm nghal a ni bawk.

He hunah hian Line Department hotute, Bank hrang hranga thawktute, Zirlaite, Kahrawt veng VC member leh YMA hotute an tel a ni.