Mizoram State Legal Services Authority (SLSA), Excise & Narcotics Department leh Champhai District Legal Services Authority (DLSA) te tangkawp chuan vawiin khan Damdawi hman khawloh avanga harsatna tawkte leh damdawi hman khawloh hluar nuaibo anih theih dan tur  chungchanga dan hriat turte inzirtirna an buatsaih.

He hun I&PR Auditorium, CHANEM a neih hi Pu Vanlalenmawia, MJS, Member Secretary, Mizoram State  Legal Services Authority  chuan kaihruaiin,  Police leh Excise Officer-te chu thil tisualtuin a phu tawk hremna a hmuh ngei theihna turin zawnchhuah leh hnuchhui kawnga fimkhur turin a chah a.  Dan hmanga roreltu Judicial Officer-te pawh Police leh Excise Officer-te’n uluk taka an hnuchhui dan an rawn thehluhte ngaipawimawha tihtak zeta lo zirchianga enzui thin turin a chah a. Damdawi hman khawloh avanga chhungkua leh khawtlanga harsatna thleng  chu veiawm a tih thu sawiin,  a do leh tihrem hna chu dan kengkawhtute kutah  chauh a awm lova, kan zavaia thawhho leh intawiawmtawn a ngai a ni, a ti a. Damdawi hman khawloh leh a nghawng thalote tihrem kawnga inzirtirna hun buatsaih ani chu lawmawm tiin, Seminar chhim tura kalkhawmte chu mithiam tak takte zirtirna ngun taka ngaithlaa   chhawr tangkai tum  turin a chah a ni.

Vawiin Seminar-ah hian Pu Peter Zohmingthanga, Assistant Commissioner, Excise & Narcotics Department chuan ND&PS Act hnuaia damdawi hman khawloh ven anih theihna tura dan hrang hrangte kenkawh anih dan a sawifiah a.  Pu R.Vanlalena, MJS, Addl. District & Sessions Judge, Champhai District-in ‘ND&PS Act awmzia leh nihphungte a sawi zau a, hnuchhui fimkhur tawk loh avanga thil tisualtute man loha chhuah leh mai an nih theih chhante sawiin, an phu tawk hremna an hmuh theihna tura hriat leh zawm tulte a sawifiah bawk. Zirtirna neih anih hnu hian zawhna leh chhanna hunte neiha sawiho a ni a. Seminar kalte hnenah Certificate sem niin, Pi Lalrochami Ralte, MJS, Secretary, Champhai District Legal Services Authority chuan lawmthu sawiin seminar a khar a ni.

Vawiin Seminar-ah hian Police Officers, Excise Officers, DLSA members, SLSA members leh Chanchinbumite an tel a ni.