3797/2022-2023

Champhai, the 9th March, 2023: Vawiin khan Undivided Champhai District chhunga damdawi zuartu (drugs dealer) te tan I&PR Auditorium, CHANEM Building-ah Orientation Training buatsaih a ni a, he hun hi Pu Lalsawma Pachuau, Drugs Controller and Licensing Authority, Directorate of Health Services (DHS), Mizoram chuan khuallian niin a hmanpui.

Pu Lalsawma Pachuau chuan damdawi zuartute chu damlote thih leh dam chungchangah mawhphurhna lian tak an neih thu sawiin, damlote'n an mamawh tak damdawi an ei theihna turin an pawimawh hle a ni, a ti a. Damdawi zawrh chu thil dang zawrh nena thil danglam tak, licence neih ngai a nih avangin Department pawh a fimkhur a, a zuartute pawh kan fimkhur hle a ngai tih sawiin, mawhphurhna lian tak an neih chu hlen chhuak ngei turin a chah a. Damdawi zuarte tana zawm tur dan siam chu zawm theuh tura chahin, khawvel changkannain a ken tel hmasawnna hrang hrangte chu ban phak ve zel tura inzir zel turin a fuih a. Damlo mangang hmachhawn thin an nih avangin an mahni dawrtute chu hawihhawm taka dawngsawng thin turin a chah bawk.

Training-ah hian damdawi zuartu kalkhawmte chu an mawhphurhna hrang hrang te, dan bawhchhiatna awm thei leh a hremna dante zirtir an ni a. Damdawi lem, mihring tana tha lo zawrh palh theihna laka fimkhurna tur hrang hrangte bakah mipui nunna chungchangah mawhphurhna thui tak an neih thute zirtir an ni bawk.

Training hi Pi C. Ramdinmawii, Asst. Director, (Food and Drugs), CMO Office Champhai chuan a kaihruai a. Undivided Champhai District bialtu Pu F. Lalliantluanga, Dy. Director (Food & Drugs), DHS Mizoram hnen atangin thu sawi ngaihthlak a ni bawk a. Pi Zarzokimi, Asst. Drugs Inspector, CMO Office Champhaiin lawmthu sawiin hun a khar a ni.

Vawiin training-ah hian Undivided Champhai District-a damdawi zuartu (drugs dealers) 208 te an tel thei a ni.