4686/2024-2025

Champhai, 18th March 2025: Vawiin khan Champhai DC Conference Hall-ah District Consultative Committee (DCC), District Level Review Committee (DLRC) leh District Level Security Committee (DLSC) chu an Chairman, Bawrhsap Pu Mohammad Aaquib kaihhruaiin an thu khawm a. Kum 2024 October –  November Quarter chhunga Champhai District-a Bank hrang hrang te hmalakna an thlir let a ni a. Mizoram sawrkar flagship programme ‘Ban a Kaih’ chungchang pawh an sawiho a ni. 

Ṭhutkhawm kaihruaitu Pu Mohammad Aaquib chuan kalkhawmte lawmna thu sawiin, ram sum leh pai dinhmun bakah mipuite nunphung chawikanna chu Bank-te kutah thui takin a innghat a ni, a ti a. He mi kawngah hian Bank-te chu ṭhahnemngai taka thawk turin a chah a, DCC ṭhutkhawm leh hunah chuan result ṭha zawk neih tum ṭheuh turin a fuih bawk a ni. 

He hunah Pu Lawmkima, Lead District Manager (Convenor) chuan meeting agenda sawi hawnna aneih hnuah Champhai District chhunga Bank ten mipuite tana hlawk zawk leh tangkai zawka hna an thawh theih dan tur te sawiho a ni a. Mizoram sawrkar flagship programme’Ban a Kaih’ hnuaia ‘Progress Partners’ te hnena loan pe tu tur, Partner Bank - SBI, MRB leh MCAB te hmalak dan tur sawiho niin, harsatna hrang hrang awm thei laka inven dan tur leh scheme a hlawhtlin ngei theihna tura thawhho dan tur te pawh sawiho a ni bawk. 

Vawiin ṭhutkhawmah hian Quarter liam ta (October - December 2024) chhunga Bank hrang hrang te chet dan pawh thlirho niin, District chhunga Bank zawng zawng te CD Ratio (Bank-in pawisa deposit an hmuh atanga pawisa an puk chhuah tir zat) chawhrual chu za zela 62.01%a ni tih tarlan a ni a. Hei hi ram pum huap tehfung (National Benchmark) za zela 60% aiin a sang zawk a ni. He hun chhungah vek hian mipuite tan ‘Financial Literacy Campaign’ vawi 35 huaihawt a ni tih tarlan a ni bawk.

He hunah hian Union Budget 2025-26 aṭangin Kisan Credit Card (KCC) hnuaia sum puk theih zat tihpun a nih thu Pi Lalhmachhuani, DDM, NABARD hnen aṭangin ngaihthlak a ni a. KCC hnuaiah hian kuthnathawktute tan dahkham (collateral) ngai lovin cheng nuai 2 thleng puk theih a ni a, ‘Modified Interest Subvention Scheme’ kaltlanga cheng nuai 3 chin puk theih chu cheng nuai 5-ah tihsan a nih thu tarlan a ni bawk.

Pu V. Lalzamvela, Executive Engineer, Champhai Power Circle chuan he hunah hian PM Rooftop Solar Scheme - PM Surya Ghar Muft Bijli Yojana chungchang sawifiahna hun a hmang a. He scheme hnuaiah hian Central sawrkarin za a 40% subsidy a pek tur thu te, state sawrkar pawhin subsidy pek a tum thu leh ni zung chakna hmanga mimalin power an thar chhuah te chu sawrkarin unit khatah ₹4.90 zelin a lei sak tur thu a sawi a. He scheme hlawhtlin theihna tur hian Bank te thawhpuina a ngen a ni. 

Ṭhutkhawma tarlan danin tun Quarter liam ta (October - December 2024) chhung hian National Rural Livelihood Mission hnuaiah mi (account) 44 te hnenah loan cheng nuai 275.20 pek chhuah a ni a. Self Help Group Credit Linkage atan cheng nuai 14 pek chhuah niin, PMEGP hnuaiah mi (account) 5 tan cheng nuai 49.10 pek chhuah a ni. Pradhan Mantri Mudra Yojana hnuaiah mi (account) 1629 hnenah loan cheng nuai ₹1378.40 pek chhuah tawh a ni bawk. 

Vawiin ṭhutkhawmah hian Champhai District chhunga Public Sector Bank, Regional Rural Bank leh Private Bank aiawh te bakah line department aiawhte, Village Council leh tlawmngai pawl hruaitute an tel a ni.