DIRECTORATE OF INFORMATION & PUBLIC RELATIONS, Government of Mizoram, India

4687/2024-2025

Lunglei, 2025 Vau thla ni 18: Horticulture Department Lunglei leh Lunglei Florist Association (LFA) te buatsaih ni nga chhung (March 18 - 22, 2025) awh tur pangpar chi hrang hrang pho chhuah runpui, Florist Fair 2025 chu vawiin chawhma khan Lungleia Saikuti Hall Ground Floor-ah Lunglei District Bawrhsap Pi Navneet Mann chuan a hawng.

Khuallian Pi Navneet Mann chuan thlai leh pangpar hmanga ei zawnna tihhmasawn nana District Horticulture Office leh Lunglei Florist Association te hma lakna lawmawm a tih thu sawiin, Florist Fair ṭha tak an buatsaih thei chu a lawmpui thu a sawi a. LFA te'n Inkaihhruaina Dan Bu ṭha tak an nei chu lawmawm a tih thu leh felfai taka an kal chhoh zel a beisei thu a sawi a. Pangpar chin kawnga hma lakna chu thingtlang lo neih ringawta innghat lova ei zawnna chi dang ṭha leh hlawk zawk a awm zel theihna tura hma lakna peng pawimawh tak pakhat a nih bakah, pangpar chingtu tam zawk chu hmeichhia an nih angin hmeichhiate tihchak leh tihhmasawnna kawng pawimawh tak pakhat a nih bawk thu sawiin, sawrkar, pawl, kohhran leh mimalin kan mamawh ang intodelh turin pangpar chingtute chu ṭan la zel turin a fuih a. Lunglei District thar chhuah chawi lar tur bik, One District One Product (ODOP), "balhla" chawi lar a, balhla hmanga ei zawnna tipung tura hma lak chhoh mekah hmasawnna a awm chhoh zel a beisei thu sawiin, LFA Inkaihhruaina Dan Bu thar chu a tlangzarh nghal bawk a ni.

Lungleia Florist Fair 2025 hawnna inkhawm hi Lunglei District Horticulture Officer Pu B. Lalzarzova'n kaihruaiin, Baptist Church Orphanage (BCO) Manager Rev. H. Vanlalruata'n hunserh a hmang a. Hun hmanpuitu Lunglei Additional Deputy Commissioner Pi Rochuangkimi Khenglawt chuan pangpar chin chu sum hmuhna hnar a nih baka nun tihlimtu leh hahdamna a ni tel chu a hlut zualna a nih thu sawiin, hmunhma nei zau lote tan pawh in leh a velah chin mai theih a nih angin chin uar zel ṭha a tih thu a sawi a. LFA te'n sawrkar thil tihna hrang hrangah leh vantlang hmunhma cheina kawnga sawrkar an thawhpuinaah lawm thu sawiin, Fair hlawhtling tak an neih theih nan duhsakna a hlan a ni.

He hunah hian LFA Secretary Pi F. Lalduhzuali'n report pein, LFA chu kum 2022-a din a nih thu leh tun dinhmunah member 120 vel an awm mek thu a tar lang a. LFA Adviser Pi Vanlalpianpuii chuan lawm thu sawiin hun a khar a ni.

Lunglei Florist Fair 2025-ah hian pangpar zuar mi 19-in an pangparte mipui tana man man zawka lei theih tura pho chhuakin, flower pot, lei ṭha leh thlai enkawlna bungrua leh a kaihhnawih thil dangte pawh lei theih tura pho chhuah a ni bawk a. Fair hi mipui a duh apiang tana chhim theih niin, March ni 22, 2025 (Inrinni) thleng a awh dawn a ni.

He Fair-ah hian ODOP (One District One Product) stall buatsaih ni bawkin, Lunglei District ODOP thlai balhla aṭanga thil siam (product) hrang hrang - in chi (banana juice), kamram (banana chips), chhangphut (banana flour) leh a dangte pho chhuah a nih bakah, Mausen Banana Growers Association te'n sawrkarin a bunsak, balhla um hminna (banana ripening chamber)-a an balhla um hminte an zuar bawk a ni.

He Fair-ah hian Lunglei Tlawng nula thlai tharlam - carrot, changkha leh thlai chi hrang hrang tan stall siam a ni bawk a. Lushai Agriculture Procucer Company Ltd, Lunglei chuan Tuisenchhuah tomato thar an zawrh bakah, huan thlai chin leh enkawlna hmanrua (horticulture tools & implements) an zuar tel bawk a ni.

Lungleiah hian kum 2023-ah Florist puala District Fair neih ṭumin pangpar zuartute'n ₹ nuai 1.83 an lei chhuak a. Kum 2024 February thlaa District Horticulture Fair-ah ₹ nuai 2.69 leh November thlaa District Florist Fair-ah ₹ nuai 3.59 an lei chhuak leh bawk a. Lungleia pangpar chingtute'n an pangpar chin aṭanga sum an hmuh chhuah hi a pung chho zel a, tun ṭumah pawh hian kum hmasa lam aia tam sum an hmuh chhuah beisei a ni.

Attachment