4688/2024-2025

Saitual, the 18th March, 2025: Vawiin khan DC Conference Hall, Saitualah Pu V. Laldinsanga, DCIO leh Project Director, DRDO ni bawk kaihhruainain Bana Kaih (Handholding) Scheme pilot phase hnuaia Saitual District-a thawhpui tura thlan chhuah (progress partner) mi 36 te tan orientation training buatsaih a ni.  

He hunah hian Saitual Bawrhsap Dr. Lalngura Tlau chuan inlawmna thu a sawi a, Saitual District-ah progress partner 36 lai thlan chhuah an ni chu lawmawm a tih thu a sawi. Bawrhsap chuan Bana Kaih scheme chu Sawrkar Flagship programme pawimawh tak niin tipuitling tur pawhin theih tawp sawrkarin a chhuah zel a ni tih a sawi a, a hlawhtlinna chu progress partner teah a innghat thui hle dawn a ni, a ti. 

Dr. Lalngura Tlau chuan line department te chu kaih chhuah tur thlan kawngah fimkhur turin a chah a, mi dik leh rinawm thlang chhuak ngei turin a fuih nghal a ni. Bawrhsap chuan kalkhawmte chu training hlawk thlak tak nei turin duhsakna a hlan a, zawhna an neih ang te zawt hreh lo turin a chah bawk. Midangte tana malsawmna ni tura, rinawm taka thawk a, theih tawp chhuah turin a sawm nghal bawk a ni. 

Orientation training-ah hian mi 36 te chu hetiang hian line hrang hrang atan thlan chhuah an ni a: Agriculture dept- 6, AH & Vety- 7, Horticulture dept-16, LRS&WC- 2, Sericulture-1, Science & Tech-1 leh Tourism-3 te an ni. Training hi zirtir tura ruat bik (resource person) te chuan heng thupui hrang hrang tarlan te atang hian zirtirna an pe a ni: Basics of entreneurship, Bana Kaih scheme hrilhfiahna, banking-loans details & process, loan scheme’s under SBI, entrepreneurship schemes & entrepreneurial mindset, loan scheme’s under MRB, finance: feasibility of business and ability to repay loan, Mizoram Startup Mission, Accounting, bookkeeping, day book. Orientation training neih zawhah hian line department theuhah technical training neih leh a ni ang.