3329/2022-2023

Champhai, the 24th January, 2023: DC's Office Champhai leh Champhai District Chess Association (CDCA) tangkawp buatsaih, First DC's Trophy Champhai District Chess Tournament 2023 chu vawiin chawhma dar 11 khan Champhai District Bawrhsap, Pu James Lalrinchhana chuan DC Conference Hall-ah a hawng.

Khuallian Pu James Lalrinchhana chuan hun chawpchilh tak karah Champhai District Chess Association hruaitute thawhrimna zara DC's Trophy Champhai District Chess Tournament hmasa ber tan a ni thei chu lawmawm a tih thu sawiin, bul tan anih angin thawhhona tha tak hnuaiah tournament lian leh changtlung zawk kalpui chhunzawm tuma ruahmanna neih a ni, a ti a. Chess game khel turin rilru leh taksa hrisel neih a tul thu leh inthununna tha tak leh nun kawng hrisel vawn a pawimawh thu a sawi bawk a. Champhwi District-ah chess game chawilar zel a pawimawh thu sawiin, ruihhlo leh hunawl hman that lohnain thalaite a tihbuai mek karah rilru leh taksa hriselna pe theitu chess game ngaihven tura hnuhluh a tul thu a sawi a. Chess game chuan zirlaiteah thluak hman thiamna leh ngaihruat thiamna a tuh avangin zirlai puitu tha tak a ni a, District Education Committee pawhin chess chu chawilara, zirlaite puih nana hman anih theih nan hmalak a tum a ni, a ti bawk.

District Bawrhsap chuan game ropui tak chess chu naupangte atanga bultan a pawimawh thu sawiin, District mai nilo state, ram pum leh khawvel anga hlawhtlinna chang turin tuichilhna leh thawhrimnana neih a pawimawh thu a sawi a. Chess khel thiam Mizorama champion pawh lo ni tawh Champhaiin a kawl nual chu lawmawm tiin, chess khel tan tir leh tuimite chu fuih phura zirtir chhawng turin a chah a. Chess player kalkhawmte chu chess game hmanga a tha zawnga midangte entawntlak leh zirtirtu ni theuh tum tura chahin First DC's Trophy Champhai District Chess Tournament 2023 chu a hawng a ni.

Hawnna hun hi Pu VL Sangpuia, Vice President, Champhai District Chess Association chuan kaihruaiin chess chawilar leh tihhmasawn nana District Bawrhsap hmalakna leh thahnemngaihnaah CDCA aiawhin lawmthu a sawi a. Pu Rinthangpuia, Asst Secretary-in hunserh hmangin Joint Secretary Pu Rampanmawia'n report a pe a, Champhai District-ah Mizoram Chess Association (MCA) rating top 10 zingah Champhai District chess player 2 an awm mek thu leh Mizorama champion tawh player 4 an awm mek thu a sawi a. Arbiter Pu Jacob Chawikhuma, Secretary, CDCA in tournament neih dan turte a sawifiah hnuah First DC's Trophy Champhai District Chess Tournament 2023 chu tan a ni.

First DC's Trophy Champhai District Chess Tournament 2023 ah hian chess khel thiam mi 29 an tel a; DC Conference Hall-ah January ni 24-25, 2023 chhung hian table 14 ah round 5 hmanga inelna hi neih a ni ang.