3330/2022-2023

Kolasib dated 24th January 2023: Vawiin chawhma khan I&PR Conference Hall, Kolasibah ni 18 January 2023 atanga 'National Girl Child Day 2023' puala hun hman țan tawh kharna neih niin Pu John LT Sanga, Deputy Commissioner chu khuallian a ni a. Pu Lalțanpuia Chhangte, District Mission Coordinator chuan hun kaihruaiin Dr. Lalawmpuia Chhangte, Chief Medical Officer leh Dr. David Zaitinvawra, District Child Protection Officer-ten raipuar, naute leh naupang enkawl seilenna kawnga thil pawimawh hrang hrang zirtirna hun an hmang bawk a ni.

Pu John LT Sanga, Deputy Commissioner chuan hmeichhe rahbehna avanga an dinhmun siamțhatna kawnga harsatna chu khawvel ram hrang hrangah hmuh tur a la awm țhin avangin India sawrkar chuan heng harsatnate hi nuai bo a nih theih nan 'Beti Bachao, Beti Padhao' a kalpui thu a sawi a. Sakhuana leh khawtlang inkaihhruaina inan loh avangin India ram hmun țhenkhatah pawh hmeichhe naupiang iaina a la hluar hle thu sawiin hei hi inneih chhawm phutna nasa tak a awm țhin vang a nih thu a sawi. Hmeichhiate chu chhungkaw enkawl leh kawng dika kaihhruai kawnga thawktu pawimawh berte an nih avangin khawtlang tihhmasawnna kawngah te, ram leh hnam tihhmasawnna kawnga thawktu pawimawh tak an nih thu Pu John LT Sanga chuan tarlangin State dangte nena khaikhin chuan Mizoram chu hmeichhe dinhmun tihhmasawn kawnga tițha pawl tak an nih thu a sawi. National Girl Child Day 2023 hmanna chuan Kolasib district chhunga hmeichhiate dinhmun tihhmasawnna kawngah leh hmeichhiaten eizawnna ngelnghet an neih theihna tura zirtirna pek kawngahte hmasawnna hmel thar a thlen phah ngei a beisei thu a sawi bawk a ni.

Dr. Lalawmpuia Chhangte, CMO chuan India ramah hmeichhe nau tihtlakna a thlen loh nan dan țha tak kalpui a nih thu te, chu dan hnuaiah chuan nu pum chhunga naute mipa emaw hmeichhia emaw a nihna tlangzarh khap tlat a nih thu leh dan bawhchhiate hrem an nih dan hrang hrang a tarlang a. Dr. David Zaitinvawra, DCPO hnen atangin khawtlanga hmeichhiate himna tura dan hrang hrang awm te ngaihthlak a ni bawk.

Hmeichhia kum 18 hnuai lam, infiamna lama Kolasib district tihmingțhatu Jacinta F.Lallawmzuali, Țumpui veng, AMKA buatsaiha Inter District Karate Championship 2023-a Gold Medal latu hnenah National Girl Child Day 2023 pualin duhsakna thilpek leh lawmpuina thuziak hlan a ni a. Pi Zonunpuii, Specialist Financial Literacy hnen atangin National Girl Child Day 2023 hman dan tlangpui ngaihthlak a ni. Vawiin hian National Girl Child Day 2023 puala Poster inziahsiakna lawmman sem a ni a, District Hospital-a hmeichhe naupiang awm te hnenah naupuan leh lawmpuina Cheng 2000 pek a ni dawn bawk a ni.