2024/2024-2025
Champhai, 12th September 2024: Vawiin khan Champhai District Bawrhsap Pu VL Remliana hovin District Consumer Protection Council thutkhawm vawikhatna chu DC Conference Hall, Keifangtlangah neih a ni.

Pu VL Remliana chuan dan ang taka thil kalpui a nih theih nan mipuite dikna leh chanvo te chu inhrilh hriat leh inzirtir thar fo a tul hle a ni, a ti a. “Kan zavaiin mamawh nei leh thil leitu theuh kan nih avangin kan dikna vawnhim kawngah theihtawp chhuah a kan tan ho a ngai a ni,” a ti bawk.

He hunah hian Pu CC Sakhawliana DCSO Member Secretary chuan Agenda sawifiahna leh Council thil tum sawifiahna neiin, District Consumer Protection Council thil tum ber chu District chhunga Consumer dikna chanvo tihhmasawn leh humhalh a nih thu a sawi.

He hunah hian District Consumer Protection Council hmalakna tur leh thil tumte ngaihtuah ho niin, Consumer te chanvo hrang hrang humhalh leh tihhmasawn dan tur te pawh sawiho a ni.

District Consumer Protection Council hi sawrkar hriattirna angin July ni 1 2024  khan Deputy Commissioner  Chairman-na hnuaiah   din a ni a. He council-ah hian sawrkar department hrang hrang 12 bakah tlawmngai pawl hruaitute an tel a ni.