2023/2024-2025

Saitual the 12th September, 2024: Vawiin khan Rural Development Minister Prof. Lalnilawma kaihhruainain Saitual Town Planning & Development Committee chu a vawikhatna atan an thu khawm a, Saitual Planning Boundary Description chungchang ngaihtuahho niin, Google Earth Map hmanga Boundary Pillar(BP) hrang hrang thlirho nghal a ni a, committee chuan he boundary pillar ruahmanna hi a pawm a ni.

He thutkhawm kaihruaitu Minister chuan Saitual District chu District thang mek a ni a, a than zelna kawngah Town Planning mumal tak neih a tul tih a sawi. Mipuite hawi khaw thawnna tur City park-te, insawizawina hmun Open gym-te siam theih ni se, a ti a. Saitual Town cheibawlna kawngah hian committee chuan mawhphurhna sang tak a nei tih a sawi a ni.

District Bawhsap, Vice Chairman ni bawk Dr Lalngura Tlau pawhin Town Planning hlawhtling tur chuan VC tih bik awm lova town rilru put a tul tih a sawi a, chenna hmun leh sum dawnna hmun chu mumal taka thliar hran a pawimawh tih a sawi bawk. Kawngpui, mihring kalna tur leh lirthei kalna tur pawh mumal taka siam a tul a ni, a ti. District Bawrhsap chuan kalkhawmte chu town hmasawnna tur hrang hranga ngaihtuahna seng turin a sawm a ni.

Chief Town Planning Officer, UD & PA, Pu Zoduailova Zote chuan khawpuia rem leh rem lo a in sak hian chhiatna tam tak a thlen thin avangin khawpui than zelna atan Master Plan neih a tul tih a sawi a, Master Plan-in a tum chu khawpui mawi tak leh chenna tlak tura siam a, a mi chengte pawh inlungrual taka an awm theihna a ni tur a ni, a ti. Chumi tur chuan ramri (boundary) mumal tak siam hmasak phawt a ngai tih sawiin chuta tang chuan hma a lak chhoh zel theih a ni, a ti. Saitual Town Planning hi kum 20 atana duan a ni a, kum 10 hnuah ennawn theih niin hemi chhung hian member ten hmathlir an nei a nih chuan ziaka thlen theih reng a ni tih a sawi.

Deputy Director, Member Secretary ni bawk Pu RL Zidinga pawhin thu sawiin ramri khamna kawnga an hma lak dante sawi zauna a nei a, member-te chu plan hrang hrang sawiho a, inrawnkhawm a ngaih thin tur thu a sawi bawk.

Vawiin thukhawmah hian Committee chairma  Minister Prof. Lalnilawma, Vice Chairman Dr Lalngura Tlau, DC Saitual, Pu Pukhraj Kamal, SP Saitual, Pu Zoduailova Zote, Chief Town Planning Officer,UD& PA,  Pu RL. Zidinga, Dy Director, UD&PA bakah line department hrang hrang aiawhte, district head of offices-te leh non-official member, NGO-te leh tlawmngai pawl aiawhte an tel a ni.