2022/2024-2025
2024 Mimkut thla ni 12: Sawrkar Laipui Ministry of Rural Development hnuaia thingtlang ṭhalaite'n mahni kutkawiha ei zawnna an neih theihna tura thiam thil zirtirna hmun, Rural Self Employment Training Institute (RSETI) ruahmanna kal tlanga Lungleia District-a RSETI hmasa ber leh Mizorama a pathumna, HDFC Bank-in India rama RSETI an kalpui hmasak ber tur ni bawk, Government J. Buana College (GJBC), Lunglei campus-a mi chu vawiin khan Mizoram Sawrkara Health & Family Welfare Minister Pi Lalrinpuii'n a hawng.
Minister Pi Lalrinpuii chuan ribbon chep chata HDFC-RSETI chu hawngin, pindan hrang hrang a fang kual nghal a. JB College Multipurpose Hall-a HDFC-RSETI hawnna pual inkhawm tawi buatsaihah thu sawiin, HDFC Bank-in Lungleiah ṭhalaite thiam thil zirtirna atana RSETI bul an ṭan chho chu lawmawm a tih thu leh ṭhalaite'n training ṭha tak piah lama an bul ṭanna tur sum ngaihtuahpui thei tur bank nena inkungkaihna an nei leh zel tur chu lawmawm lehzual a tih thu a sawi a. HDFC-RSETI atana an mamawh pindan leh hmanraw dangte hmantirtu Government J. Buana College thuneitute chungah lawm thu a sawi bawk.
Minister Pi Lalrinpuii chuan Mizoramah sawrkar hna chu hna ṭhaa ngaih a nih laiin mi tin thawh vek theih a nih loh bakah, ram chhung ei leh bar intodelhna leh hmasawn nan sawrkar hna chauh ni lo, kut hna thawh leh sumdawnna te, ei zawnna hrang hrang kalpuitute an pawimawh vek tih sawiin, sawrkar hna ngawr ngawr um lova mahni kutkawiha ding thei tura thiam thil bik zir chu a pawimawhin, uar deuh deuh a ṭul a ni, a ti a. Sawrkar pawhin hemi hawia ṭhalaite kaihhruai leh zirtir chu a veiin, ruahmanna hrang hrang a kalpui chho mek tih a sawi. Training hlawhtling nei tur chuan mipui mamawh, hna awmnaah ngei training pek a pawimawh tih sawiin, ram leh khawtlang mipuite mamawh zir chiang hmasa a, chumi phuhruk thei tur course chu duang chhuak a, chumi hawi zawnga RSETI chu kalpui turin RSETI hotute chu a ngen a. Govt J. Buana College hotute pawh an zirlaite thiamna tipung tura RSETI beh chhana vocational course hrang hrang kalpui dan ngaihtuah turin a rawn a. Ruihhlovin kan ṭhalaite, chhungkua leh ram min run mek laiin, HDFC-RSE training institute chu ṭhalai sual kawnga peng palh turte'n nun bul an ṭan a, hmabak eng tak an neih theih phahna, Lunglei District ṭhalaite tana ei zawnna tlak thiamna pe chhuaktu a nih a beisei thu sawiin, institute leh zirlaite chu duhsakna a hlan nghal a ni.
He huna khual zahawm Lunglei District Bawrhsap Pu R. Lalṭhazuala chuan tun laiah zirna tluang pangngai aṭanga hna a van tawh avangin thiam thil bik nei tura inchher hriamna hmun chu a hlu telh telh tih sawiin, chuti ang zirna hmun aṭanga zir chhuakte'n an zir chhuah ruala hna dang zawn ngai lova an thiam thil hmanga ei an zawng nghal thei tur chu a hlutna a ni, a ti a. Zirlaite chu tih tur dang hriat loh vanga run dala zir ve mai mai ni lo va, thiamna tak tak paw chhuak a, ram leh khawtlang leh chhungkuain a chhawr tlaka inzir chhuah ngei tum turin a fuih a ni.
He hunah hian HDFC-RSETI Lunglei Director Pu Ashis Banerjee chuan inlawmna thu sawiin, HDFC-RSETI bul ṭan chhoh dan leh an dinhmun report a pe a. Zirlai ai awhin puan ṭhui (tailoring) zirlai, Lalrinnungi chuan thu a sawi bawk.
He hunah hian Lunglei Municipal Council (LMC) Chairman Pu Lalzuithanga, HDFC Bank Mizoram Cluster Head Pu John Varte, HDFC Bank Lunglei Branch Manager Pi Lalnuntluangi Vanchhawng leh HDFC Bank Mizoram Area Head Pi Lalhmingmawii te bakah, sawrkar official-te, HDFC-RSETI-a thawktute leh zirlaite an tel a. HDFC Bank Mizoram Cluster Head Pu John Varte chuan lawm thu sawiin, Lungleia HDFC-RSETI chu India rama RSETI ṭha ber pawla din chhuah an tum dawn tih a sawi a. Lunglei District mipuite tana an luan chhuah zel theih nan mipuite thawhpuina an mamawh tih sawiin, Lunglei District mipuite chu HDFC Bank dawr zel turin a ngen nghal a ni.
Ministry of Rural Development chuan India ram chhunga bank awm zawng zawngte chu RSETI kal tlanga ṭhalai hna nei lote hnenah mahni kutkawiha eizawnna neia an intodelh theihna tura zirtir a, kawng kawhhmuh turin a ti a. Hemi bawhzui hian thingtlang khuaa hna thawh tur nei lote awm tamnaah hmun 598 laiah bank hrang hrang kal tlangin RSETI hi din tawh a ni a, Lungleia HDFC-RSETI hi a hnuhnung ber leh naupang ber a ni.
HDFC-RSETI Lungleiah hian trade pathum - puan ṭhui (tailoring), beauty parlour management leh computer hardware & networking zirna te kalpui niin, zirlai 98 an awm mek a. Zirlai zawng zawngte hi an hmanraw mamawh - uniform, hostel/boarding chenna tur leh ei in leh an zirna senso man chawi lovin a thlawn veka zirtir an ni.
HDFC Bank hi India rama private sector bank lian ber leh khawvela private sector bank lian ber 5-na niin, ram pumah social responsibility leh skills development programme 182 vel a kalpui mek a. Mizorama district pasarihah branch 11 an nei mek a ni. HDFC Bank hian Corporate Social Responsibility (CSR) kal tlangin June ni 16, 2020 khan Civil Hospital Lunglei-ah ₹ nuai 40 man hu medical equipment an lo pe tawh bawk a ni.
Attachment
- Loading attachment...
