2025/2024-2025

Dated Serchhip, the 12^th September, 2024: Vawiin khan Serchhip District ah HIV/AIDS/STI awareness campaign hawnna chu Serchhip DC Pu Paul L.Khuma hovin Serchhip Auditorium ah neih a ni. 

Intensive IEC Campaign - ‘India fight against HIV/AIDS & STI’ tia vuah HIV/AIDS leh mipat hmeichhiatna hman khawloh atanga inkaichhawn theih natna laka kan fihlim theih nana Awareness Campaign beihpuithlak hi India ram pumah neih niin Mizoramah pawh District hrang hrangah neih mek a ni a. Serchhipah chuan tukin zing khan HIV/AIDS awareness rally hmanga bul tan niin zirlai te leh mipui thahnem takin Serchhip AOC kawn atangin Serchhip Auditorium thleng kawng an zawh a ni. 

Rally neih zawh hnu hian Serchhip Auditorium-ah programme neih chhunzawm nghal a ni a. Khuallian Pu Paul L.Khuma chuan thusawiin HIV/AIDS leh STI inkaichhawn dan te, heng natna laka inven dan te leh a dona kawnga hma kan lak dan te hi kan hriatchian a tulzia a sawi a. Natna tihbaiawm tak ni mah se, nun kan fimkhur chuan kan kai lo thei a ni tih hria a, tawng pawng hlauh loh tur a nih thu te leh a vei te pawh thinhrik mai loh tur a nih thu te, DC chuan a sawi a.  He natna laka kan inven theihna kawng tha ber chu mipat hmeichhiatna hman khawloh laka fihlim te,  damdawi tih chhin loh te, ruihhlo leh a kaihhnawih zawng zawng laka inven te a nih thu sawiin, tih chhin loh leh tih loh tawp hi invenna tha ber a ni, a ti.  Zirlai kalkhawm te chu fuihin khawvelin a buaipui HIV/AIDS lakah Serchhip District, Mizoram leh India ram a fihlim theih nan IEC Campaign neih chhunga an thil hriat leh zirchhuah te a taka nunpui tur leh, midang te zirtir chhawng tu nih tum theuh turin a chah a ni.  

DC Pu Paul L.Khuma kaihhruaiin vawiin IEC Campaign hawnna a tel zawng zawng ten Intiamkamna (pledge) sawirualna hun an hmang a ni. 

Kum 1981 khan HIV/AIDS natna hi hmuhchhuah a ni a, South East Asia a he virus hmuh a nih hmasak ber chu Thailand ah 1984 kumah a ni a.  Mizoramah hian kum 1990 atanga September 2023 thleng khan HIV positive mi 29514 an awm tawh a. India ram pumah mihring cheng zat atanga chhutin Mizoramah hian HIV positive an tam filawr hle a ni. Serchhipah hian July 2003 atanga July 2024 chhung khan mi 49811 test zingah mi 621 positive hmuhchhuah a ni a, hei hi za zela chhutin 1.99% a ni. Serchhip District pumpuiah kum 2023-2024 chhung hian HIV positive hmuhchhuah zat chu 84 a ni a, hei hi za zelah 2.8% a ni.  HIV inkaichhawn dan chi hrang hrang zingah mipat hmeichhiat hman khawloh atanga kai an tam ber a, HIV positive hmuhchhuah zinga za zela 60% hian sex atangin an kai a ni. 

Intensive IEC Campaign - ‘India fight against HIV/AIDS & STI’ hi kalpui chhunzawm zel a ni dawn a. Zirlai naupang te tan musicial drama competition te, debate competition te, poster insiamsiak te buatsaih a ni a. September ni 13, Zirtawpni hian lawmman semna hun hman a ni dawn a ni. 

Vawiin hawnna inkhawm hi District AIDS Control Officer Dr Lalnunhlima Khiangte chuan a kaihruai a. ICTC Counsellor leh OSTC Medical Officer ten kalkhawmte zirtirna hun an hmang a ni.