No.3935/2021-2022

Aizawl, the 8th February 2022 : Vawiin khan Champhai District Level Committee on Myanmar Refugees chu a tum khat nan an Chairman, Pi Maria C.T Zuali, District Bawrhsap hovin Champhai DC Conference Hall-ah an thu khawm.

Bawrhsap Pi Maria C.T Zuali chuan thenawm ram tualchhung buaina avanga himna zawnga raltlante mumal leh felfai zawka enkawl a tul thu sawiin, District Level Committee leh Village Level Committee-te inkarah thawhhona tha tak a awm a tul thu a sawi a. Tun dinhmun mai piah lamah nakin thlenga kan awm zel dan turte thlir chunga ngaihtuahna sen a ngai a ni, a ti a. Kum khat chuang raltlante buaipuia tlawmngaia hmalatu Sub-Hqrs. YMA Champhai (SYMA) te inpekna chu fakawm tiin, mimal, pawl leh kohhran anga mi inphalte chungah lawmthu a sawi a ni.

Raltlante chanchin kimchang chhinchhiahna leh ID Card pek tur buaipui chhoh mek chu India khua leh tui nihna tur ni lovin, raltlan dik tak, India rawn bela rawn tlante tana inkaihhruaina mumal zawk siamna tur leh chhawmdawlna buaipui kawnga hmalakna pawimawh tak a ni, a ti a. Raltlanten India ram an rawn belh chhan ang ngeia ram dan leh inkaihhruaina siamte tha taka an zawm theihna tura dan leh hrai inzirtirna, Legal Awareness Campaign huapzau thei ang ber raltlante puala neih a nih tur thu pawh a sawi bawk.

He hunah hian raltlante enkawlna kawnga hmalakna kalpui dante leh hmachhawpte ngaihthlak a ni a. Raltlante mamawh leh chhawmdawl kawnga tul hrang hrang; riahbuk, tui, eng, ei leh bar leh tul dangte sawiho a ni a. Awmze nei zawka inenkawlna leh inkaihhruaina siam leh inhrilhhriatna siam tha tih a ni a, raltlan awm tamna khuaahte Sub-Hqrs. YMA Legal Cell leh Police tangkawp buatsaihin Legal Awareness Campaign neih nise tih a nih bakah, dan leh hraite Village Level Committee on Myanmar Refugees-te kutah pek chhuah vek nise tih a ni bawk.