No.3934/2021-2022

Aizawl, the 8th February 2022 : Vawiin khan DRDA Conference Hall Lunglei ah Vanapa Society buatsaih ni 30 awh Skill Development Training Programme kharna neih a ni. Pu Kulothungan A, Deputy Commissioner, Lunglei chuan kharna program hi hmanpuiin training chhuak te certificate a hlan a ni.

Skill Development Training-ah hian mi 22 ten training hi hlawhtling taka zo felin electrical wiring (theory leh practical) an zir chhuak a ni.

Pu Kulothungan A chuan Mizo thalaite zingah mahni kutkawiha dinchhuah tum, mi tum ruh leh beiseiawm tam tak a hmu chu lawmawm a tih thu sawiin skill development lamah tun aia tan lak a tul thu a sawi a. Mizo thalai ten theihna leh thiamna hrang hrang an neih hmang tangkai lehzual tura a duh thu sawiin training chhuakte an kal zelna turah duhsakna a hlan a ni.

Thusawitu dang Pu R Lalzarzova Regional Manager MRB Lunglei pawhin thalai te hnena loan an pek theih hrang hrang te a sawi a, loan la tura thil pawimawhte leh hlawhtling tur chuan loan rulh that te, leh rinawm a pawimawh thu te a sawi bawk.

Pu Evan Munsong DDM NABARD in Vanapa Society leh NABARD thawhhona kal zel ah hetiang Skill Development Programme hi neih anih thu a sawi a, hun lo kal zel turah pawh mipui ten NABARD hmang tangkai leh zual turin a sawm bawk.

Vawiin programme hi Pu Lalramhluna’n a kaihruai a, Training report Pu Malsawmtluanga Ralte, Training coordinator in a pe bawk. Trainees te atangin thusawi ngaihthlak niin training kal kim mi 22 te hnenah certificate hlanna neih nghal a ni bawk.