No.3933/2021-2022

Aizawl, the 8th February 2022 : Vawiin khan Mizoram State AYUSH Society Governing body chu an chairman Dr R.Lalthangliana, Health Minister hovin SAD Conference Hall, MINECO-ah an thukhawm.

Dr R.Lalthangliana chuan AYUSH chu sawrkar laipuiin a ngaih pawimawh avangin Mizoram State chhungah hmasawnna hna pawh chak takin a kalpui theih a, tun dinhmunah District hrang hrang tan Hospital thar, khum 50 awm theihna tur leh khum 10 awm theihna tur dil mek a ni a, Sawrkar Laipui Ministry of AYUSH chuan heng proposal te hi a pawmpui tawh a ni, a ti. Heng hospital dinna tur atana sum ruahmanah hian thawktu rawihna tur leh bungraw mamawh leina tur pawh dah tel a ni tih Minister chuan a sawi bawk.

AYUSH Mizoram chuan National AYUSH Mission hnuaiah kum 2020-2021 chhung khan chak takin hma a la a. District 11-a khaw 44 ah a thlawna inentirna free health camp/clinic a buatsaih a. Hei bakah hian District tina Childrens Home zawng zawngah free health clinic a buatsaih bawk. District tina sawrkar enkawl Middle School-ah School Health Programme a buatsaih a, school zirlai ten taksa leh rilru hrisel an neih theihna turin AYUSH chuan hma a la a ni. Tawngtai Bethel Camping Centre te nen thawk hovin kum 2019 atanga khan thla khatah tum hnih zel Centre-a awm te hriselna endik thin a ni a. Anni bakah hian ruihhlo ngaite enkawlna home dangah physical & stress management session an neihpui thin bawk. AYUSH Gram hnuaiah Lunglei District chhunga khaw 5 ah leh Aizawl District chhunga khaw 4 ah vantlang zun in, bazara bawlhhlawh senghawina hmun, ramhmul damdawi chinna leh enkawl zuina hmun te an siam a. A thlawna inentirna leh awareness campaign te an nei bawk. Sports Association leh club thenkhatte nen thawk hovin physical and stress management session an neihpui thin bawk a no.

Sawrkar laipui duhdan angin Mizoram chhunga Sub-Centre awm zawng zawng atanga chhuta za zelah sawm (10%) chu AYUSH doctor te enkawl turin Health & Wellness Centre-ah siam a ni dawn a. Sub-Centre 38 te chu Mizoram District 8 atanga thlan chhuah niin National AYUSH Mission, Mizoram chuan a enkawl dawn a, an zinga centre 24 te chu tha taka function tir an ni tawh a. A bak 14 te hian hna an thawh ve thuai theihna turin vawiin Governing Body thukhawm chuan thawktu lak dan tur an sawiho a. Health Secretary chairman-na hnuaia din Selection Board-in thawktu thar an lak thuai theihnana dilna agenda lut chu Governing Body thukhawm chuan a pawmpui a ni. Sub-centre 14 thlanchhuah, Health & Wellness Centre-a hlankai tur te hi January 17, 2022 khan sawrkar laipui Ministry of AYUSH chuan a pawmpui tawh a. Thawktu lak a nih dawn bakah sub-centre cheithat hna leh hmanraw mamawh leina tur sum dah tel a ni.

Kum 2020-2021 khan AYUSH Hospital khum 50 awmna tur DPR chu Champhai, Hnahthial leh Aizawl atan Ministry of AYUSH chuan a thuphungin a pawmsak tawh a. Saitual, Hortoki leh Khawzawl-ah te khum 10 awmna hospital pakhat theuh sak dilna DPR thehluh pawh Ministry chuan a thuphungin a pawmsak tawh a ni. New Capital Complex ah AYUSH Development Centre sak tum niin dilna hi North Eastern Council ah thehluh a ni a, hei pawh hi a thuphunga pawmpuina (approval) hmuh a nih tawh thu meeting-ah hian tarlan a ni.

Tun dinhmunah khum 50 awmna AYUSH Hospital pakhat Thenzawlah a awm mek a. Khum 10 awmna hospital hi Lunglei, Champhai, Siaha, Lawngtlai, Mamit, Kolasib leh Serchhip District ah te a awm a. AYUSH IPD building chu Hnahthial, Tlabung, Sakawrdai, Biate, Vairengte & Lengpui khuaah te awmin AYUSH OPD Building chu Thingsulthliah, Haulawng, Sairang, Marpara leh S.Vanlaiphaiah te a awm bawk.

Governing Body, Mizoram State AYUSH Society, National AYUSH Mission-ah hian Health Secretary chu Member Secretary niin Health & Family Welfare Department hnuaia official pawimawh te bakah Planning leh Finance Department aiawh te chu member niin meeting ah hian an tel a ni.