No.3932/2021-2022

Aizawl, the 8th February 2022 : Vawiin khan SEDP Executive Board chu a vawikhatna atan, Deputy Chief Minister Pu Tawnluia, SEDP Executive Board, Chairman ni bawk leh State Planning Board Vice Chairman Pu H. Rammawi, SEDP Executive Board, Vice Chairman ni bawk te kaihhruaina hnuaiah Conference Hall Assembly Annex Building ah an thukhawm a. MLA 14 leh Department sawm (10) Director te telna Executive Board meeting ah hian MLA ten zau takin Sawrkar kum thar lo awm turah SEDP kalpui dan tur chungchanga an ngaihdan leh an ngaipawimawh te bakah Sawrkar flagship programme a hlawhtlin nana thil tul leh pawimawh nia an ngaihte chu an sawilang bawk a ni.

Deputy Chief Minister Pu Tawnluia chuan Sawrkar Flagship programme SEDP bul tan chhoh tawh chu chhunzawm zelin mimal leh chhungkua te thleng tur scheme leh programme sawiho nana Board meeting a vawikhatna atana neih chu lawmawm a tih thu sawiin SEDP chu mipui te dawmkanna tur bakah ram hmasawnna tur atana duan a nih angin zau takin an ngaihdan leh tul leh pawimawh nia an hriat leh ngaih te chu sawichhuak turin MLA te chu a sawm a. Covid hripuiin kum 2 zet min tuam avangin duh anga chakin hma a lak theih loh chu pawi tiin Sawrkar in sum a neih dan ang zel in SEDP hi theihtawp chhuahin mipui leh ram hmasawnna leh changkanna atan kan kalpui dawn a ti a. Sawrkar kum thar lo awm turah SEDP hmangin chhungkaw 60,000 vel tuam tum anih thu sawiin hemi atan hian cheng vaibelchhe 300 bawr vel ruahman a ni dawn a, hei hi a thawhkhatna tur a ni dawn a, sum kan neih dan zirin kan kal zel dawn a ni, a ti.

State Planning Board Vice Chairman Pu H. Rammawi chuan kum 2019 atangin SEDP kenkawh leh kalpui dan chungchanga State Planning Board in hma an lak dante sawiin kum thum chhungin hma lakna hrang hrang te awm tawhin Agriculture, AH & Vety leh Commerce & Industries, Horticulture leh Fisheries Department-te hnuaia beneficiary oriented scheme te chu lo kalpui tawh a ni, a ti a. Mahse hripuiin min nuai avangin Sawrkar chu a tum angin kan kal thei lova, beneficiary oriented scheme chungchangah pawh duh angin ke kan pen chak thei lo a ni, a ti a. SEDP sum beneficiary dawng turte chu an account a Direct Transfer angin thun a nih tur thu a sawi a ni.

Meeting ah hian District Level leh Village Level a SEDP kalpui nana Board/Committee tur ruangam chungchangte, beneficiary thlan chungchangte, thlai leh trade hrang hrang thlan chungchangte, thlai/thei loneitute an chin mek, engemaw chen an hlawhtlinpui tawh, hlawhltling zawka SEDP hnuaia chhunzawm dan chungchang te, thingtlang leh khawpui a SEDP kalpui dan tur chungchangte, beneficiary te tuina leh an hlawhtlinpui ngei theih thil ngaihpawimawh chungchangte chu zau takin sawiho a ni a. MLA hrang hrang ten an biala SEDP hmalakna atana pawimawh leh tul nia an hriatte an sawi a, rawtna hrang hrang an siam tel bawk a ni.

Sawrkarin January ni 31, 2022 khan SEDP Executive Board ruatna leh an mawhphurhna tur chungchanga hriattirna a chhuah a. Deputy Chief Minister Pu Tawnluia chu Chairman, SEDP Executive Board ah ruat niin State Planning Board Vice Chairman Pu H. Rammawi chu Vice Chairman SEDP Executive Board ah ruat a ni a. MLA 14, Board Member a ruat te chu - Pu Lalrintluanga Sailo; Er. H. Lalzirliana; Pu Lalrinsanga; Pu C. Lalmuanpuia; Prof. F. Lalnunmawia; Pu L. Thangmawia; Dr. ZR. Thiamsanga; Pu Zothantluanga; Pu Ramthanmawia; Dr. Vanlaltanpuia; Pu Lawmawma Tochhawng; Prof. K. Pachhunga; Pu H. Biakzauva leh Pu K. Laldawngliana te an ni a. Anni bakah hian Department 10 Director te chu Member ah ruat an ni bawk a, chungte chu : Agriculture, Horticulture, Animal Husbandry & Veterinary, Commerce & Industries; Urban Development & Poverty Alleviation, Rural Development, Land Resources & Water Conservation, Sericulture, Land Revenue & Settlement leh Fisheries Department-te an ni a. Secretary, Planning & Programme Implementation Department chu Member Secretary atana ruat a ni bawk.

Board mawhphurna tlangpui chu : SEDP project hrang hrang kenkawh leh kalpui te; SEDP Governing Board in policy a siam te bawhzui leh ti hlawhtlin te; SEDP Governing Board in sum a ruahman te, a hmandan tur duan te leh SEDP kalpui dan tur atana ruangam leh inkaihhruaina hrang hrang siam te a ni.