No.3936/2021-2022

Aizawl 8th February, 2022 : Vawiin khan DC Conference Hall, Mamit-ah District Level Fire Prevention Committee, Mamit District buatsaihin Fire Prevention Week, 2022 hawnna neih a ni a. Pu Lalnunhlua, Mamit District Bawrhsap chuan khuallian niin he hun hi a hawng.

Khuallian District Bawrhsap chuan Week hawnna-a kalkhawm sawmbikte chungah lawmthu sawiin kangmei ven pawimawhzia pu darh thei tur chin an nih ang ngeiin mahni level-ah theuh theihtawpchhuah turin a chah a. Ramkang venna kawngah tlawmngaipawl hrang hrang leh thutharthehdarhtute zarah tih theih tam tak a awm a. Khawtlang hruaitute pawhin mahni veng theuhah aurinna leh hmanraw dang hmangtein kangmei venna kawnga theihtawpchhuaha tan la turin a chah a. Kangmei ven chu mitin mawhphurhna a ni tih hriain kangmei tichhuak lo tura tan la theuh turin District mipuite a sawm bawk a ni.

He hunah hian Pi Jenny Sailo, DFO, Mamit chuan report pein Pu K. Lalmuankima, Honorary Wildlife Warden Mamit chuan thu a sawi bawk.

Fire Prevention Week, 2022 hi Ni 7th - 12th February chhung hman tur niin "Kangmei ven hi mitin mawhphurhna a ni" tih chu Week thupui atana hman a ni.

Vawiin Kangmei ven hapta hawnna hi Pu Vanlalchhuanga Chhangte, President, Sub Hqrs. YMA, Mamit-in kaihruaiin Pu CL. Thantluanga, President, MUP, Mamit District chuan hunserh a hmang a. District Level Fire Prevention Committee members-te an tel a ni.