122/2023-2024

Champhai, the 17th April, 2023 : District Level Committee on SEDP, Champhai District chu vawiin chawhma dar 11 khan DC Conference Hall-ah an Chairman Pu James Lalrinchhana, District Bawrhsap hovin an thu khawm. He hunah hian chhungkaw tinzawna kalpui Family Oriented SEDP (FO-SEDP) thawhkhatna Phase-I kalpui dan thlirlet a nih bakah a thawhhnihna Phase-II kalpui dan turte sawiho a ni.

Bawrhsap Pu James Lalrinchhana chuan Line Department hotute chu an Department chan theuh hnuaia SEDP dawngtute hmalak dante tha taka enzui turin a fuih a. Phase-II kalpui tur chungchangah hmalak chhoh mek zel a nih thu sawiin, a buaipuitute chu nakin zel atana enfiah tlak leh felfai a nih ngei theih nana uluk taka inkaihhruaina duan anga kalpui turin a chah a. Department scheme dangte nen pawha kalkawp tir theih a nih avangin hemi kawnga zirchianna nei theuh turin a chah a. Hun bituk ang zela kal thei tura hmalakna tur chhawpchhuahte ngaipawimawh tur leh lo inruahman lawk thiam turtein a chah bawk a. Online kaltlanga SEDP Phase-II kalpui tum a nih thu sawiin, Sawrkar flagship programme pawimawh tak Socio-Economic Development Policy (SEDP) hlawhtlin nana theihtawp chhuah theuh turin a chah nghal bawk.

He hunah hian Family Oriented SEDP thawhkhatna kalpui kawnga Line Department hrang hrangte hmalakna ngaihthlak a nih hnuah SEDP kalpui nana hriattur tul hrang hrangte Nodal Officer, Pi Esther Leihang, SDC hnen atangin ngaihthlak a ni a, sawihona leh inrawnkhawmna hunte hman a ni.

Thukhawm chuan Village Level Committee on SEDP te tan Phase-II kalpui tan hma ngeia training buatsaih tha tih niin, heng bakah hian Village Level Committee on SEDP siamrem dilna lutte ngaihtuah niin pawm a ni a. Phase-II hnuaia hamthatna dawng thei tur rawtna thlen hun hnunhnung atan April ni 30, 2023 an ruat a; Village Level Committee on SEDP te chu hun bituk chhunga rawtna an neihte District Level Committee on SEDP hnena thehlut hman vek turin an chah a. District Level Committee on SEDP chuan dilna lutte chingfelin Online Portal-ah May ni 15, 2023 ral hmain an thehlut leh dawn a ni. SEDP thawhhnihna hi Mizoram State E-Governance Society (MSeGS) te nena tangrualin online a kalpui tum a ni.

A thawhhnihna Family Oriented SEDP Phase-II kaltlang hian Assembly Constituency pakhat atangin hamthatna dawngtu tur mi 1,400 zel thlan chhuah tur niin, Champhai District-a Assembly Constituency 3; 23-Champhai North, 24-Champhai South leh 25-East Tuipui Assembly Constituency atangtein avaiin beneficiary 4,200 thlanchhuah tur a ni a. Ruahman dan chuan Family Oriented SEDP thawhhnihna hi Champhai District-ah chuan Line Department 8; UD&PA, Agriculture, Animal Husbandry & Veterinary, Horticulture, Sericulture, Fisheries, Commerce & Industries leh Land Resources, Soil & Water Conservation Department-te kaltlanga kalpui tur a ni.

Meeting-a tarlan a nih danin Champhai District-ah Village Level Committee on SEDP 68 din a ni a. Family Oriented SEDP thawhkhatna Phase -I kaltlangin Assembly Constituency tin atangin hamthatna dawngtu beneficiary 1,500 thlan chhuah niin, an vaiin beneficiary 4,500 an awm a. Beneficiary boral leh rokhawlhna avanga siamrem ngai 7 te tih loh chu Line Department hrang hrangte chuan Family Oriented SEDP Phase-I kaltlangin tanpuina first installment leh second installment an pe chhuak fel tawh a ni.

He hunah hian Pu M.Misael, Addl. DC Champhai; Pu Lalrinawma, PD, DRDO Champhai & Member Secretary, District Level Committee on SEDP leh member dangte an tel a ni.