121/2023-2024

Lunglei the 17th, April" 2023: NABARD leh World Vision India tangkawp ten thingtlang a retheite dawmkanna atana an hmalakna pakhat Women's Self Help Group Variety Store (Gram Dukan) Venglai, Lungleia siam chu  vawiin chawhma khan Lunglei Bawrhsap Pi Ramdinliani, IAS in a hawng.

Hawnna inkhawm tawi SHG Dawr Venglaia neihah hian Pi Ramdinliani chuan vawiinah hian dawr hawng satliah lovin he Self Help Group hlawhtlinna leh a than len zel nan zawk a he hun hi hmanpui a nih thu a sawi a. Mizoramah SHG ti tha tak tak leh ti mai mai an awm laiin a ti tha engemawzat dawk chhuak an awm mek chu a lawmawm a tih thu sawiin sorkar puihna hmang tangkai thiam te chu mi vannei, mi dingchhuak an ni thin a, an than lenna zela hmalakna chu SHG te taimakna ah a inghat a, tanpuina a tawp veleha chaurau mai an nih chuan mi nep ber an ni tihna a nih tur thu a sawi bawk. Phai lam hmun thenkhat ah SHG hmanga chhungkua an chawm theih chuan lehkha thiam tamna ramah SHG ten kan hlawhtlin theih lohna chhan tur a awm lova, kan thil zawrh leh packing te mawi zawk leh mi hip zawka siam a pawimawh thu sawi bawkin tih tak tak a ti turin leh taimak chhuaha hlawhtlinna chang ngei turin SHG kal khawmte a chah a ni.

He hunah hian Pu Evan T. Munsong, District Development Manager, NABARD, Lunglei pawhin NABARD hmalakna pakhat SHG Dawr thiltum sawifiahin thingtlang lama rethei zawk ten man man zawk leh daih rei thei tur bungrua leh hmanrua te hmanga mahni intohdelh a sumdawnna kalpui tura Bank tanpuina a bik takin hmeichhia te zingah kalpui thin niin chumi atan chuan Self Help Group (Bank Linkage Programme) hi kum 1992 atang in kalpui tan a ni a ti a. He Programme pawimawh tak kaltlang hian sum leh pai a an mahni intungding thei lo te hnenah loan hmangin tanpuina sumfai pek thin a nih thi a sawi a, he programme kalpui zelah hian NABARD chuan SHG te chawikanna turin Bank leh sumdawnna suihzawm sakin an thiam thil hrang hrangte inchawmna atan an hman theihna turin hma a lakpui thin thu a sawi bawk. NABARD chuan World Vision India kaltlangin cheng nuai li leh sangkhat pein vawiina hawntak SHG Dawr (Gram Dukan) hi Obadia SHG te enkawl turin Venglai Lungleiah din a ni a. He SHG Dawr hi Obadia SHG te tan chauh nilo, lo nei a eizawngtute, puan tah tute leh a dangte tan kawng kawhhmuhtu tangkai tak leh an thil thar chhuah leh siam chhuah te hralhchhuah kawng a pui tu pawimawh a nih a beisei a ni.