2999/2024-2025
Champhai, 14th November 2024: State Disaster Management Authority (SDMA) leh District Disaster Management Authority (DDMA) tangkawp buatsaihin vawiin khan Champhaiah tuilian leh leimin thlen thulha chetlak dan tur nunchan zirna, District Level Mock Drill on Flood and Landslide hlawhtling taka buatsaih a ni.
District Level Mock Drill on Flood and Landslide lemchan entirin a tarlan ang chuan chawhma dar 10:45 khan tuilian leh leimin thlen thu Siren ti riin hriattirna pek chhuah a ni a. Tuilian leh Leimin avang hian ram kang leh lei chim a awm bawk a ni. Ralkhel dar tihrik a nih vel leh hian, District Disaster Management Authority (DDMA) buatsaih District Disaster Management Plan (DDMP) anga hmalak nghal a ni a, hemi kaihhnawih Official hrang hrangte chu District Emergency Operation Centre (DEOC) atana ruat Circuit House-ah tlan khawmin hmalak dan tur Champhai DDMA Member Secretary Pu Ngulzaṭhuama, SDO (S), District Bawrhsap mawhphurhna la mek tu hovin an rel a. Incident Commander turte ruat niin chhiatna thlen thu report-na hmunah tirhchhuah an ni a. Staging Area atana ruat Circuit House tualah Quick Response Force, Medical Team, Fire & Emergency Services leh Disaster kaihhnawih hrang hrangte awmin chhiatna report dawn a nih ang zelin DDMA Member Secretary thupekin tirhchhuah nghal zel an ni.
Mock Drill kalpuia chhiatna thlenna hmun atan hian hmun pali ruat a ni a. Chungte chu - Leimin - Pu Lalrinngheta Building, Zote; Tuilian (Flood) - Tuipui Lui, Zote kai chhak; Lei (Bridge - Chim) - Tuipui Lei, Zote kai; Ram kang - Zote P&E Transformer te an ni. Heng chhiatna thlenna hmunah te hian hnathawktu ten leimin leh tuilian thlen thulha chet lak dan tur nunchan zirin chhanchhuah hna an thawk a. Medical Team ten hliam tuarte enkawlna pein a na zualte leh mitthite chu Champhai District Hospital-ah Ambulance pathum hmanga phurh thlen niin, Damdawiin lama thawktute pawhin chhiatna thlen thulha chetlak dan tur inpuahchahna tha takin an entir bawk a ni.
District Level Mock Drill on Flood and Landslide neih zawhfel hnu hian Circuit House, Conference Hall-ah mock drill kalpui dan thlirlet a ni a. He hunah hian Incident Commander leh Observer atana ruat ten Head Observer Dr PC Lalhmingliana, Sr. CMO hnenah report an thehlut a. He huna tel te hian chhiatrupna ṭhlen palh pawha inpuahchahna ṭha zawk leh hmasawn ngaihna lai te an sawiho a ni.
DDMA Champhai chuan hlawhtling taka District Level Mock Drill on Landslide and Flood neih a nih theih nana Line Department hrang hrangte, Zote khawtlang hruaitute leh mipuite bakah VLDMC te, Champhai District Hospital, Fire Station, QRT, GREF BRTF leh mawhphurhna hrang hrang tha taka hlenchhuaktute chungah lawmthu an sawi a ni.
