3000/2024-2025

2024 Sahmulphah thla ni 14: Vawiin khan National Disaster Management Authority (NDMA), State DMA leh District DMA te ṭang ho huaihawtin Mizoram district zawng zawngah lei min, tui lian leh ram kang lo thlen thulha felfai zawka chet lak dan tur en chhinna, "State Level Mock Exercise on Landslides, Floods & Forest Fires" buatsaih niin, Lungleiah chuan hmun li (4)-ah lei min vanga chhiatna thleng anga en chhinna (mock exercise) kalpui a ni.

Zing dar 10:10-ah Lunglei Bawrhsap pisaa District Emergency Operation Centre (DEOC) aṭangin chhiatna thlen hriattirna (disaster siren) tihrik niin, mock exercise hi ṭan a ni a. Ruah sur nasa leh lei min vangin Lunglei khawpui hmun hrang hrangah chhiatna thleng anga tih chhin niin, chhiatna tenau hmun hrang hranga thleng karah hmun pali - District Education Office Complex, Electric Veng, Lunglei; Civil Hospital Lunglei, Chanmari; Jedaz Petrol Pump bul, Zotlang, Lunglei leh Lunglei Bazarveng Kikawn kawng peng ṭhuam te chu chhiatna thlenna pui deuh anga lantirin, lei tawlh, in chim, kawng ping leh kangmei chhuak kara chhanchhuah hna thawh dan leh chet lak dan tur a taka chan chhin a ni a. DEOC atana ruahman DC Office Video Conference Hall aṭangin Responsible Officer (RO) Pu R. Lalṭhazuala hovin mock exercise hi vil niin, DLAO office kawt chu chhanchhuah hna thawhnaa hman tur khawl leh mihring innghahna hmunpui (staging area) atan ruahman a nih bakah, Saikuti Hall chu hliam tuarte leh chhiatna tawkte awm lailawkna (relief camp) atan ruahman a ni bawk a. Chet lak dan hi State lam aṭangin live video-in an lo vil bawk a ni.

He mock exercise-ah hian chhiatna thlen veleha mipui insaseng dan tur te, chhiatna thleng chungchang thuneitute hnena hriattir thuai dan tur te, quick response team (QRT) leh chhiatna thlenna bul hnaia awm khawtlanga tlawmngai pawlte’n chhanchhuah hna an thawh nghal dan tur te, police lamin motor tlan dan an thunun a, chhiatna thlenna hmun an ven dan tur te, kang ṭhelhtute leh line department hrang hrangin an mawhphurhna an hlen dan tur te, hliam tuarte’n damdawia enkawlna an dawn thuai theih nana medical team-in an tih tur leh damlo enkawl hmasak ngai leh na vak lote thliar dan tur te, damdawi ina phurh dan tur leh chhanchhuaktu pawl lian zawk disaster response force (DRF) te hmanraw chi kim nen an lo thlen huna an chet lak dan tur te a tak ang thei ber tura zir chhin a ni.

He mock exercise atan hian sawrkar department hrang hranga thawktute bakah, DM&R Quick Response Team (QRT), veng hrang hrang khawtlang hruaitu leh YMA member-te'n mawhphurhna hrang hrang lain, mahni mawhphurhna ṭheuhte a ṭha thei ang bera hlen chhuak turin theih tawp an chhuah hlawm a ni.

Mock exercise neih zawh a nih hnu hian video conference kal tlangin chet lak dan thlir hona (debriefing) buatsaih chhunzawm nghal a ni a. Lunglei DC Office Video Conference Hall aṭangin DDMA Chairman Pu R. Lalṭhazuala hovin debriefing hi chhim a ni a. He hunah hian incident site hrang hranga site incident commander leh site observer te hnen aṭangin report ngaihthlak niin, hmasawnna tura rawtna hrang hrang sawi ho a ni bawk.

Lunglei DDMA Chairman Pu R. Lalṭhazuala chuan mock exercise hlawhtling tak buatsaih a nih theih nana tha leh hmanrua thawhtu zawng zawng chungah leh ṭha taka thuneitute thawhpuitu Lunglei mipuite chungah lawm thu a sawi a ni.