2219/2026-2027

Dated Champhai the 15th September, 2026: Vawiin khan Champhaiah  National Action Plan for Drug Demand Reduction (NAPDDR) hnuaia Champhai District Level Nasha Mukt Bharat Abhiyaan (NMBA) Committee chu District Bawrhsap Pu Mohammad Aaquib kaihhruaina hnuaiah DC Conference Hall, Keifangtlangah an ṭhukhawm.

Chairman Pu Mohammad Aaquib chuan ruihhlo dona kawngah sawrkar leh tlawmngai pawlte'n ṭangruala beihpui thlak a ngaih thu leh, District chhunga zirlai leh ṭhalai zawng zawngte ruihhlo laka an fihlim theih nana zirtirna neih chu thil tul ber pakhat a nih thu a sawi a. Vaihlo zial leh e-cigarette zuk chungchang pawh ngaihpawimawh a tul hle a, vaihlo zial leh e-cigarette (Vape) zuk hi ruihhlo dang tihna kawnga hmahruaitu leh hriselna tichhetu pakhat a nih avangin, school naupangte atanga zu lo tura inzirtirna neih a ṭûlin ngaihpawimawh hmasak a ngaih thu sawi a, hemi kawnga ṭan la theuh turin meeting-a kal te chu a sawm a ni.

He hunah hian Pi Thelma R. Zonunmawii, Member Secretary leh DSWO ni bawk chuan Champhai District chhunga ruihhlo donaa hma lakna leh hmachhawpte report a pe a ni.

Thutkhawmah hian FY 2026-27 chhunga ruihhlo laka ṭhalai, sikul naupang leh college zirlaite an him theihna turin hmalakna turte sawiho niin, Sikul leh College-ah Anti-Drug Club 20 din tura ruahman a ni a, heng club-te kaltlang hian rally, essay writing, leh poster siam hmangtein zirlai pual campaign uar taka neih thin a ni ang a. Khawtlang himna tura hmalakna hrang hrang Khawtlang hruaitute, Police, Health Department, leh Tlawmngai Pawlte tangrualin ruihhlo hluarna hmunte ngawrh zawkin an vil ang a, a bik takin Sikul leh College chhehvel metre 100 huam chhungah meizial leh ruihhlo hrim hrim tih leh zawrh khap tura Enforcement Team-te nen man leh vil hna thawh chhunzawm a ni ang.

Master Volunteer mi 50 thlan chhuahte tan training buatsaih a ni ang a, khawtlanga ruihhlo ngaite enkawlna leh chhawmdawlna pe a hma lak a ni ang. District chhunga De-addiction Centre 7-te vil chhunzawm zelin, enkawlna dawng tawhte tan mahni kea an din a, eizawnna mumal tak an neih theih nan kutthemthiamna (Tailoring leh Carpentry) zirna buatsaihsak an ni ang. Mipui zawng zawng huap inzirtirna zau zawk kalpui a nih theih nan Local Media, TV, Radio, leh Social Media (YouTube) kaltlanga puanzar chhunzawm zel tura ruahmanna siam a ni. Heng bakah hian ruihhlo do kawnga hmalakna hlawhtling zawka kalpui a nih theih nan District Level Drug Demand Reduction Committee leh Block Level Drug Demand Reduction Committee te pawh din a ni.

Vawiina District Level Nasa Mukth Bharat Abhiyan thutkhawmah hian Addl. SP, CMO, DEO, DIPRO, AC(Excise & Narcotics), CDPO, DCPO leh Legal Service Authority te bakah Sub-Hqrs YMA, MUP, MHIP, Metakhen Centre, Genesareth Gospel Home, Grace Receiver's Home aiawhte an tel a ni