2220/2026-2027 

Dated Khawzawl, the 15th September, 2026 : Vawiin khan Khawzawl District Narco-Coordination Centre (NCORD) Committee-in a lo rel tawh angin Kawlkulh Town Hall-ah Khawzawl Deputy Commissioner Pu K. Vanlalthiana, District NCORD Committee Chairman ni bawk hovin ruihhlo do awareness campaign neih a ni a. Dr. Albert Lalhminghlua, Medical Superintendent, District Hospital, Khawzawl District chuan hun a kaihruai. 

Khawzawl DC Pu K. Vanlalthiana chuan thu sawiin, Kawlkulh khuaah zirlai naupangte tan ruihhlo do awareness campaign buatsaih a ni chu lawmawm a tih thu a sawi a. Tunlaiah zirna a changkan chhoh zel mila Kawlkulh zirlai naupangte chu an thluak sawizawia, zirna lamah an rilru leh ngaihtuahna senga, nitin thil thar thiam turin a fuih a. Lehkhathiam ni tur chuan ruihhlo laka filhim a pawimawh tih sawiin, an hma hunah khawtlang leh ram tan mi tangkai ni turin duhsakna a hlan a ni.

Mizoram Drug Users’ Forum (MDUF) President Pu Lalremruata leh Adviser Pu Moses Zofaka Pachuau te chuan zirlai naupangte hnenah ruihhlo tih chhin pawi zia te, a nghawng tha lo te leh nghei a har zia te an sawi.

Thusawitu dang Khawzawl Sub-Divisional Police Officer (SDPO) Pu Jeremia Vanlalhmachhuana chuan Narcotics, Drugs & Psychotropic Substances (ND&PS) Act chungchang a sawifiah a. Zirlai kalkhawmte chu an hma huna an nih tumte an tihhlawhtlin ngei theih nan ruihhlo laka fihlim tlat turin a chah a ni.

He hunah hian ruihhlo ti lo turin kalkhawmte an intiam a. A duh apiang tan a thlawna test chi hrang hrang tih theihna ‘Integrated Health Camp’ neih a ni bawk a. Khawzawl Addl. Superintendent of Police Pu Zosangliana chuan lawmthu sawiin hun a khar.