4744/2024-2025

Champhai, 21st March 2025: Vawiin khan Govt Champhai College Multipurpose Hall-ah District Level Viksit Bharat Youth Parliament 2025 neih a ni a. Bawrhsap Pu Mohammad Aaquib chuan khuallian niin he hun hi a hmanpui.

He hunah hian Pu Mohammad Aaquib chuan thu sawiin Viksit Bharat Youth Parliament (VBYP) chuan ṭhalaite tan inphochhuahna hun ṭha siam sak a, ram hmasawnna kaihhnawiha an ngaihdan sawina hun pek a tum a ni, a ti a. Ṭhalai ten a ṭha zawnga politics an hmuh a, danglamna thlen tura politics huangchhunga an zuan luh theih nan te; khua leh tui ṭha, ram hmasawnna ngaihven mi an nih theih nan a chherchhuah chu he Youth Parliament tum ber a ni, a ti bawk.

Bawrhsap chuan zirlai kalkhawmte chu an nuam tih zawng piah lam a kalchhuak ngam turin a fuih a. Zirna kawnga harsatna an neih te, ngaihtuahna thar an neih te leh an college mamawh te ngaihthlak sak a, theihtawp chhuah pui a inhuam thu sawiin an mamawh hun apiangah amah pan hreh lo turin a chah bawk a ni.

Viksit Bharat Youth Parliament hi Department of Youth Affairs, Ministry of Sports & Youth Affairs leh Govt. Champhai College te inremna kaltlanga buatsaih a ni a. Champhai College-ah hian Champhai leh Khawzawl District chhunga ṭhalai kum 18 aṭanga kum 25 inkar te tan neih a ni a, Youth Parliament-a tel tum te hian MyBharat portal-ah ‘What does Viksit Bharat means to you?’ tih thupui hmanga an thu sawi lai video minute khata rei an upload hnuah District inelna an hmachhawn dawn a. Final Round-ah hian ‘One Nation, One Election: Paving the way for Viksit Bharat’ thupui hmangin inelna neih a ni ang. District inelna a tiṭha zual mi 10 te chuan District aiawhin State inelna an hmachhawn ang a, State inelna a tiṭha ten National Level-ah Mizoram ai an awh ang. National Level-a pakhatna in cheng nuai 2, pahnihna in cheng nuai 1.5 leh pathumna in cheng nuai 1 an dawng dawn a ni.

Hawnna inkhawm hi Pi Hmingsangzuali, Nodal Officer, VBYP in a kaihruai a. Pu Lalthanpuia, Govt Champhai College Principal charge la mek tu leh Pu Dinesh K. Jangid, District Youth Officer pawhin thu sawiin, inelna hmachhawn tur hian zirlai 100 vel an inziaklut tih tarlan a ni.