No.2245/2021-2022

Aizawl the 16th, Sept' 2021: Khawpuia cheng mahni puala chenna in neilote tana insak tanpuina Scheme Pradhan Mantri Awas Yojana-Housing for All (PMAY-HFA Urban) kaltlanga hamthatna dawng tur thlangtu District Screening Committee on PMAY-Housing for All (Urban), Champhai District chu vawiin chawhma khan an Chairman Bawrhsap Pi Maria C.T Zuali hovin DC Conference Hall-ah an thukhawm.

Pi Maria C.T Zuali chuan mahni puala chenna in neiloten chenna in tha an neih theih nan sawrkar laipuiin tan a lak thu sawiin, in sakna tur pawisa dawn ngau ngauin chenna tha tak sakna tur daih lo mahse hamthatna dangte line department leh Bank kaltlanga ngaihven theih a nih thu a sawi a. Insak tanpuina dawng tur dik tak ten an dawn theih nan ngaihtuahna fim tak senga thlan a tul thu sawiin, department kut maia dah lova theihtawp chhuaha thawhpui turin VC leh khawtlang hruaitute a chah a ni.

Vawiin District Screening Committee on PMAY-Housing for All (Urban) thutkhawmah hian Champhai Town leh Census town huamchhunga insak tanpuina dilte zirchian niin, Management Information System (MIS) portal-a thun tawh hnua dilna thehlut nawn tih hmuhchhuah, inhnukdawk, boral leh chhan dangte avangin mi 39 te chu ngun taka ngaihtuah a nih hnuah an dilna hnawlsaka paih tura thutlukna siam a ni a, a thlakna tur thutkhawm leh hunah ngaihtuahho nise tih a ni. UD&PA Champhai chuan PMAY-Housing for All (Urban) 2022 Mission hmalakna kaltlangin insak tanpuina diltu mi 958 te first installment a pe tawh a, second installment mi 688 ten dawng tawhin, mi 537 ten third installment an dawng tawh bawk a, insakna tanpuina sum pekchhuah tawh zat chu cheng nuai 1148.70 a tling tawh a ni.

Heng bakah hian financial year 2021-2022 chhunga Credit Linked Subsidy Scheme (CLSS) kaltlanga dilna lutte pawh sawiho niin, Economically Weaker Section (EWS), Low Income Group (LIG), Middle Income Group (MIG)-I leh Middle Income Group (MIG)-II ten interest subsidy neia insak tanpuina loan an dil theihte pawh ngaihtuahho a ni a. Meeting-a tarlan a nih danin financial year 2021-2022 chhunga CLSS target zat 150 atangin diltu 70 chauh an la awm a ni. He hunah hian loan diltuten harsatna awm lova loan an lak theih nana hmalaksak theih dan turte pawh sawiho a ni bawk.

Vawiin District Screening Committee on PMAY-Housing for All (Urban), Champhai District thutkhawmah hian Pi R.Lalnunkimi, DUDO & Member Secretary, District Screening Committee bakah, SDO Sadar, SO, DIPRO, MLA aiawh, Bank hrang hrang leh Joint VC hotute an tel a ni.