No.2244/2021-2022

Aizawl the 16th, Sept' 2021: Vawiin khan Dr.H.Lalthlangliana, Deputy Commissioner chuan Kolasib District chhunga Pradhan Mantri Gram Sadak Yojana (PMGSY) hnuai a Bilkhawthlir – Chawnpui – Saiphai inkar kawng siam hna chak zawk a thawh a nih theih nan thawktute a kokhawm a, hna chak zawk a thawh a nih theih nan hna vilpuitu tur team din nghal a ni.

Dr.H.Lalthlangliana chuan Pu C.Lalrosanga, MP, Lok Sabha kaihhruaina hnuai a ni 25th August 2021-a District Development Coordination & Monitoring Committee (DISHA), Kolasib thutkhawm in a lo rel tawh angin PMGSY hnuai a kawng siamte chak zawk a hna kalpui a tul thu a sawi a, hna zawh hun tur bituk chhunga zo thei lo leh vawi engngemawzah hun bituk pawhsei ngai a ni thin chu pawi a tih thu a sawi. Dr.H.Lalthlangliana chuan hna chak zawka kalpui a nih theih nan hna vilpuitu tur team din a nih thu a sawi a, he team-ah hian Magistrate, PWD hnuai a SDO, Police leh Sub-headquarters YMA, Kolasib a hruaitute zing a mi ruat an nih thu a sawi bawk a ni.

Contractor-te hrileng leh ramri buai avanga hna duh anga an kalpui theih loh thu leh harsatna an tawh thinte ngaihthlak niin an hna chanpual theuhte zo theih tur a an inbeisei hun chhiahchhiah a ni a, hemi hun chhunga hna zo ngei tur a intiamna thu ziahtir an ni bawk a ni.

Vawiin thutkhawmah hian Pu Lallawmawma, Addl. DC, Pu Vanlalmuana Fanai, EE, PWD, Pu Vanlalchhuanawma Chawngthu, SDO(S), Pu Timothy R.Lalhmangaiha, BDO, Bilkhawthlir, Sub-headquarters YMA, Kolasiba hruaitute leh PMGSY hnuai a kawng siam hna thawktute an tel a ni.

Vawiina PMGSY hna endikah hian Rengtekawn – Builum road 13.52 Km a thui leh Bilkhawthlir – N. Chawnpui road 17.56 Km a thui siam hna thawktute koh an ni a. Ramri hrul a khua awm thenkhatte kalpawhna kawng a nih avangin heng kawngte hi a rang thei ang bera siam a pawimawh thu thutkhawmnaah hian sawi a ni bawk a ni.