No.2243/2021-2022

Aizawl the 16th, Sept' 2021: Vawiin khan Lawngtlai District Level Task Force on COVID-19 (DLTF) Chairman, Lawngtlai Bawrhsap Dr Andrew H. Vanlaldika hovin Lawngtlai District-a Health & Family Welfare (H&FW) Department hotute, Lawngtlai khawpui chhunga VLTF Chairman-te leh Central YLA hruaitute chu Lawngtlai DC Conference Hall-ah an thu khawm a. COVID-19 hri leng meka Lawngtlai District dinhmun leh Lawngtlai khawpui chhung bika hri kai leh kai loh enfiahna (test) kalpui dan an thlir ho.

Chairman Dr Andrew H. Vanlaldika chuan COVID-19 hri leng mekah Medical lam, VLTF leh YLA-te an thawk rimin an hah hle tih sawiin, LADC, sawrkar department hrang hrang, VC, tlawmngai pawl, kohhran leh mipui thawh hona tha tak chu lawmawm a tih thu a sawi a. Hri lengin kiam lam a la pan hleih theih loh avangin fimkhurna leh inkaihhruainate tha taka zawm zel a pawimawh thu a sawi.

DLTF Member Secretary, Chief Medical Officer Dr LP Malsawma chuan Lawngtlai District chhunga COVID-19 test kalpui dan report a pe a. Sawrkar inkaihhruaina anga hri kai leh kai loh enfiah ngai (positive contact leh compulsory test) chu ni sarih atanga ni sawm inkar chhunga test tur tih a nih angin tun dinhmunah a hun takah backlog awm lova test theih zel a nih thu sawiin, self test-te nen a pumpuiah test rate hi 96% - 100% vel a ni, a ti.

Lawngtlai khawpui chhunga VLTF Chairman-te chuan an veng dinhmun tlangpui an sawi hlawm a. Contact tracing atanga test ngai bakah mahni inrinhlelh leh mahni dinhmun hriat duh vanga test ngaite VLTF-te hriatpuia an in-test reng thu sawiin, test kalpui dan chu a tha thawkhata an hriat thu an sawi a. Hemi rual hian Lawngtlai khawpui huam chhunga mihring awm zat atanga chhutin mi za zela sawmnga atanga sawmruk (50% - 60%) vel chu test tawh an nih thu tar lan a ni.

He hunah hian Lawngtlai khawpui chhungah mass testing tih a tul chuan H&FW Dept kal tlanga mass testing hi buatsaih tura state sawrkar atanga ruahmanna a awm thu tar lan a ni a. Medical lam hotute leh VLTF-te report atanga a lan danin, Lawngtlai khawpui chhunga test kalpui dan chu tun dinhmunah chuan a tha thawkhata hriat a nih avangin mass testing chu kalpui rih loh ni se, tih a ni a. Hma lam hunah mass testing kalpui tula hriat a nih chuan VLTF-te'n mahni veng bila bawhzui a, test kit donate-tu turte zawngin, mahni senso intumin hma la zui se tih a ni. Sawrkar inkaihhruaina hman lai anga test ngai ngei ngei chin leh COVID-19 kai nia inringhlelte chu tha taka test kalpui zel a nih theih nan hma lak chhunzawm zel ni se, tih a ni bawk.