No.2235/2020-2020
Vawiin chawhnu khan Dr.ZR Thiamsanga MLA, Vice Chairman, Health & Family Welfare Board leh Covid-19 Medical Operational Team Chairman nibawk hovin Champhai DC Conference Hall-ah inrawnkhawmna hun neih a ni.
Champhai North bialtu MLA Dr.ZR Thiamsanga chuan Covid-19 vangin hmasawnna ruhrel siam leh hnathawh kawngah hun engemawchen khaihlakna a awm thu sawiin, Covid-19 hnu lama kalzel dan tur ngaihven a hun tawh thu a sawi a. Natna do kawngah kan tanrual em avangin India rama inveng tha ber kan ni thei a, hemi kawngah hian thahnemngai taka tha thawhtute a te ber atanga lian ber thlengin an pawimawh em em vek a ni, a ti a. India chu khawvela Covid-19 natna kai tam lama 4 na anih tawh vangin fimkhur zual a ngaia, thawhhona tha tak awm mek chu chhawmnun zel a tul thu a sawi a. State Sawrkarin Covid-19 dona kawngah sum leh pai mamawhte a pek zel thu sawiin, hri kai tam lutuk lo leh vei tawh te pawh an dam tan tawh thu a sawi a. Natna finfiah kawngah District leh ZMC lama thawktuten theihtawp chhuaha hna an thawh thu leh tun atanga reiloteah sample thawnte test zawh vek hman tum a ni, a ti a. Covid-19 chungchang Official ten chiang leh zuala an hriat ve zel angaih thu leh mipuite hnena hrilhhte theitu an nih a tul thu a sawi a. Covid-19 dona leh a behbawmah sum engemawzah hman anih thu sawiin, mamawh te State sawrkar CM Pu Zoramthanga kaihhruai in inhawng taka a lo dawnsawn thin thu a sawi a ni.
Dr. ZR Thiamsanga chuan Champhai district a a hmaa Covid-19 positive 5 zinga 4 te an negative tawh thu sawiin, Champhai district tan Covid-19 leh natna dangte chena en theihna tur khawl Truenat Quatro bun thuai tum anih thu a sawi a. Quarantine Centre a Ni 14 awm tawh, RT-PCR result thate chu chhuaha inlama ni sarih inkhunghran tih chu zawm mek a nih thu sawiin, mipuite chu Social distancing leh hmaituamnate ngaihpawimawh chhumzawm zela fimkhur turin a chah a. Eizawnna leh ei bar lam ngaihtuah angaih tawh avangin ngaihtuahna thar nena hmalak a tul thu sawiin, zirna lam thlenga ngaihtuah a ngai ani, a ti bawk.
He hun kaihruaitu Champhai DC Pi Maria C.T Zuali chuan Covid-19 vanga Lockdown rei tak kalpui anih hnuah district hmalak dan tur leh Covid-19 hnulam thlenga kalzel dan tur ngaihven ho tura meeting koh anih thu a sawi a. Department hrang hrangte chu inpawhtlang leh intichak tawna thawkho tur an nih inhre reng turin a chah a. Sawrkar hmalakna leh hmasawnna hlawhtling taka kalpui tur chuan department inkarah thawhhona tha a awm a ngai a, Sawrkar scheme te mipuite chhawr theih tura chhawpchhuah kawngah inpuihtawn angaih thu a sawi a. Buai tak chunga meeting koh ngaipawimawha kalkhawmte lawmna thu a sawi bawk.
He hunah hian meeting chuan ei leh bar zawn kawngah Champhai chu Agriculture, Horticulture leh Vety lama theihna sang tak nei anih angin huapzau zawka hmalak nise a ti a. Thalai hna neilo tam takte tan thiam thil zir kawngah nasa zawka tanlak nise tih niin, department kaihhnawihte lo ngaihven tura tih a ni a. Champhai khawpui mawi, thianghlim leh hrisel zawk din thei tura tanlak zel nise tih ani bawk. Meeting chuan Covid-19 natna leh a hnu leh thlenga kalzel dan tura thate inzirtirna zau tak Cable TV Talk Show hmanga neih nise tiin, hemi ruahman tur hian Pu Lalnunfela Chawngthu, SDO Sadar chu ruat a ni a. Furpui lo thleng turah kawng tha leh tlo nei thei tura hmalak angaih thu pawh sawiho niin, Champhai district chhunga thawhhona leh inpawhtlanna duhawm tak awm mek chu chhawmnun zel nise tih a ni bawk.
He hunah hian Champhai district chhunga department hrang hrang hotute bakah Sawrkar laipui hnuaia awm Official-te an tel tha hle a ni.
Meeting zawh hian Dr. ZR Thiamsanga, Bawrhsap Pi Maria C.T Zuali, SP Pu Rex Zarzoliana leh Official dangte chuan Indo-Myanmar ramria awm Zokhawthar chu tlawhin VLTF te hnenah tanpuina pawisafai leh hmanraw hrang hrangte a hlan nghal a ni.
