Mizoram
Youth Commission (MYC) buatsaih Education Exchange Exposure Tour hnuaia
Champhai District atanga Sikul Naupang thlanchhuah Siaha tlawh tur Champhai
District Team-te chu tukin zing dar 6:00 khan Dr. Lallawmkima, DIPRO Champhai
chuan Champhai Vengthlang atangin a vai liam.
Dr Lallawmkima chuan Sawrkarin Zirlai leh
thalaite hmakhua ngaiin Zirlai leh thiam thil zirna kawngah tan a lak thin thu
a sawi a. Champhai District atanga thlanchhuah Zirlai naupangte chu hun tha leh
vanneihna an chan hrerenga, an hmuh leh hriat turte thiam thil zirna kawnga
chhawr tangkai tum turin a chah a. Tluang taka kala Study Tour hlawhtling tak
hmang tura duhsakna hlanin a valiam a ni.
Vawiin vek hian District hrang hrangte pawh
Exposure Tour nei tur hian an chhuak hlawm a. Ruahman dan chuan Siaha
District-in Aizawl an tlawh dawn a, Lawngtlai District-in Kolasib, Lunglei
District-in Mamit, Aizawl District-in Champhai, Serchhip District-in Lawngtlai,
Champhai District-in Siaha, Mamit District-in Serchhip, Kolasib District-in
Lunglei te an tlawh ang a, November ni 8, 2018 ah an kir leh dawn a ni.
Tour-a kal zirlaite hi zirna lama hma an
sawnpui theih turte zir chhuak tura beisei an ni a. District Administration
kalphung bakah thlan bik H/S te tlawha zirlaite nen inkawmho nei tura ruahmanna
siam a ni a. Heng bakah hian Sorkar Pisa, hmun pawimawh leh Mizo pipute sulhnu
pawimawhte pawh tlawh tura beisei an ni.
School Education Exchange Exposure Tour-a kal tur hian Champhai District chhunga Govt.H/S leh RMSA H/S hrang hrang atangin zirlai 36 leh zirtirtu 4 thlan an ni a. Naktuk hian Siaha khawpui chhung fangin, DC Office, District Council Office, Donbosco H/S leh ECM H/S te an tlawh ang. District tin aiawh tur hian zirlai 36 leh zirtirtu 4 theuh zel, school hrang hrang atanga thlan chhuah an ni a. School tin huap kim thei lo mahse, school tam theiang ber thleng phak turin huam zau taka thlan an ni.
