State Bank of India (SBI) Lawngtlai Branch chuan nimin piah khan an office-ah Vigilance Awareness Week kharna hun an buatsaih a. 'Eradicate Corruption - Build a New India' tih thupui hmanga zirlaite puala essay writing competition an buatsaih lawmman sem nghal a ni.

He hun hi SBI Lawngtlai Branch Chief Manager Pu C. Ramdinsanga'n a kaihruai a. India ram hmun hrang hrangah Vigilance Awareness Week hi hman a ni a, hemi puala Lawngtlaia zirlaite tana essay inziahsiak buatsaihah zirlai eng emaw zatin eirukna (corruption) nuai bo a nih theihna tur kawng ngaihtuaha essay tha tak an ziak thei chu lawmawm a tih thu a sawi a. Tunlai zirlaite atanga corruption that lohzia inzirtirna bul kan tan a, corruption do tura thawh ho a ngai a ni, a ti.

Hemi hnu hian Lawngtlai District MJA Secretary Pu Elvis Lalthangzuala chuan thu tawi sawiin, eirukna chu Eden huan atanga intan tawh a ni a, vawilehkhata nuai bo theih a ni lo; mimal tin hi kan hna thawhna kawng hrang hrangah rinawm i la, chu rinawmna hmang chuan eirukna hi nasa takin kan do thei dawn a ni, a ti.

Vigilance Awareness Week puala essay inziahsiakah hian Lawngtlai khawpui chhunga school pathum Ngurnunsangi English School, Downtown English School leh Don Bosco High School atangin zirlai mi pakua an tel a. K. Gospel Lili, Downtown English School chu pakhatna niin, Rs 2,000/- leh citation hlan a ni a. Pahnihna chu Immanuel Lalawmpuia, Ngurnunsangi English School niin, Rs 1,500/- leh citation hlan a ni a. Pathumna chu Malsawmsangi, Downtown English School niin, Rs 1,000/- leh citation hlan a ni a. He'ng bakah hian zirlai paruk hnenah consolation prize Rs 500/- leh Ciatation hlan an ni bawk. Pu Elvis Lalthangzuala leh Pi Laldinpuii, Lecturer, GRHSS (Judge ni bawk) te'n lawmman hi an sem a ni.

SBI Lawngtlai Branch te hian Central YLA te'n a tul ang anga an hman atan Rs 10,000/- an hlan a. MJA Lawngtlai te hnenah Rs 1,000/- an hlan bawk a. Lawngtlai District Badminton Association hnenah tournament buatsaihna tur sum fai an hlan bawk.

Vigilance Awareness Week hi October ni 29, 2018 atanga hman tan a ni a. Hemi chhung hian India ramah corruption laka fihlim tura intiamna pledge mi nuai 5 chuangin an la a. Nimin piaha hun hmanah pawh hian corruption laka fihlim turin thu tiam nghal a ni.