Special Summary of Photo Electoral Roll 2020 hmanga Electoral Roll siam thar ber Final Electoral Roll 2020 chu vawiin khan Champhai DC Conference Hall-ah District Election Officer Pu Mark Lalthanliana’n a tlangzarh. Tlangzarh hnu hian Party aiawhte hnenah Final Electoral Roll Copy khat theuh a Bu leh Soft Copy CD-in a hlan nghal a ni.

Pu Mark Lalthanliana chuan a hun taka Electoral Roll thar ber peihfel anih theihna tura Election Officer leh Staff-te, ERO, AERO leh BLO zawng zawngte thahnemngaihna chu fakawm a tih thu sawiin, anmahni tawiawma lo pui thintu NGO, khawtlang hruaitu leh Political party aiawhte chungah pawh lawmthu a sawi a. Mipui siam sawrkar inthlang ram kan nih chhung chuan Electoral Roll ennawna siam that angai fo thin a, Electoral Roll dik leh felfai nei turin mawhphurhna chelhtu a te ber atanga a lian ber thlenga kan zavaia tanrual angai a ni, a ti. Undivided Champhai District chhunga vote nei thar kum 18-19 mi 6451 lai awm chu chhuanawm tiin, Political party aiawhte chu Booth Level Agent ruat theuh turin a ngen a. Hun hlu tak senga kalkhawm zawng zawngte chungah lawmthu a sawi bawk a ni.

He hunah hian Pu Lalnunfela Chawngthu, Election Officer chuan Electoral Roll tlangzarh tak dinhmun tlangpui tarlangin Electoral Roll siam that hna chu Champhai District thendarh anih hma anga kalpui anih thu a sawi a. Special Summary Revision of Photo Electoral Roll 2020 tlangzarh takin a tarlan danin Undivided Champhai District-a Assembly Constituency 5-ah vote nei Mipa 43317 leh Hmeichhia 44312 an awm a. Vote nei zawng zawng hi mi 87629 niin, Mipa aiin Hmeichhe voter hi 995 in an tam zawk a, Mipa Voter 1000 zelah Hmeichhe Voter 1023 awm anga chhut a ni. Draft Roll hmasa a vote awm 85363 aiin Final Roll-ah voter 2266 in a punga, a punna hi za zela 2.7 a ni. Tuichang A/C ah vote punna hi sang berin za zela 3.1 niin, a tlemna ber East Tuipui A/C chu za zela 1.6 a ni. Undivided Champhai District chhungah Polling Station 137 awmin, Polling Station 1 ah voter 640 zel awm ang a chhut a ni a. MLA Constituency zingah 23-Champhai North A/C-ah voter 19095 awmin a tam ber a, 25-E.Tuipui A/C-ah voter 15132 awmin vote nei tlemna ber a ni. Form 6 kaltlanga dilna atanga Electoral Roll a lut thar 3009 awmin, form 7 kaltlanga chhan hrang hrang vanga paih 743 an awm bawk a ni.

Kum bithliah bikah kum 18-19 Vote nei thar mi 6451 an awm a, Kum 20-29 inkar vote nei tam berin mi 23159 an awm a. Kum 80 chung lam vote nei mi 1115 zingah kum 100 chuang mi 3 an awm mek bawk a ni. Polling Station malah chuan Voters 1233 awmna 22/3-Khawzawl-I, 22-Tuichang A/C ah vote nei an tam ber a, 21/24- Taitawkawn, 21-Lengteng Assembly Constituency-ah voter 56 awmin a tlem ber a ni.

Election Commission of India in a ruahman angin Special Summary Revision of Photo Electoral Roll 2020 neih zawh tak atanga dilna hrang hrangte leh siamthat ngaite chu chin fel anih hnuah Final Electoral Roll 2020 hi tlangzarh a ni a. A hranpaa Electoral Roll tlangzarh tak mamawhte tan a Soft Copy copy leh Hard Copy-te Election Office-ah lei theihin a awm a ni.