770/2023-2024

Champhai, the 12th June, 2023: Kumin MLA General Election 2023 neih tura inpuahchahna kalzelah EVM leh VVPAT khawlte endik hna chu vawiin atang khan FLC Room, DC Office Champhaiah neih tan a ni.

He hun hmanpuitu District Election Officer (DEO) Pu James Lalrinchhana, District Bawrhsap ni bawk chuan inthlanna muanawm leh felfai neih a nih theih nan inthlanna atana hman thin khawl EVM leh VVPAT-te uluk taka enfiah hmasak thin a nih thu sawiin, hemi buaipui kawngah hian Company Engineer leh Election Official-te mai bakah political party hrang hrang aiawhte an tel thin a ni, a ti a. Champhai District-ah inthlanna felfai leh muanawm tak neih a ni thin chu fakawm a tih thu a sawi a. Hun hlu tak senga kalkhawmte fakawm a tih thu sawiin, inthlanna felfai leh muanawm tak neih a nih theih nana tawiawm zel turin a sawm a ni.

Deputy DEO Pu M.Misael, Addl. DC Champhaiin User Acceptance Test (UAT) leh First Level Checking (FLC) kalpui dan tur tlangpui a tarlang a. FLC Supervisor/Nodal Officer ni bawk chuan political party aiawhte chu zawhfiah leh hriatchian duh an neihte inthlahrung hauh lova zawt zel turin a chah a ni.

Vawiin bikah hian EVM/VVPAT khawl thar endikna User Acceptance Test (UAT) neih niin, hemi kaltlang hian CU 10 leh VVPAT 20 te endik niin, avaiin a tha vek a ni. Naktuk atanga kalpui tur EVM khawl endik hna hmasa ber, First Level Checking (FLC) kaltlang hian naktuk atangin EVM/VVPAT thar leh inthlan hmasa lama hman tawhte enfiah a ni dawn a. Vawiin lama UAT neihte bakah, inthlan hmasa lama hman avaiin Ballot Unit (BU) 151, Control Unit (CU) 179 leh VVPAT 137 te ECIL Engineer-te kaihhruaina hnuaia endik a ni dawn a. Vote thlak nana hman tawhte uluk taka thenfai bakah EVM leh VVPAT khawlte hi inthlan leh huna hman theih tura siam rem leh nghal vek tum a ni a, Political party aiawha tel te'n vote thlak chhinna Mock Poll an nei nghal zel dawn bawk a ni.

EVM khawl Control Unit, Ballot Unit leh VVPAT-te hi ECIL Company siam niin, Company lam atanga lokal Engineer rualte'n an endik a. Vawiin EVM leh VVPAT dahna hmun hawnna leh khawlte endikna hunah hian Pu James Lalrinchhana, DEO Champhai, Pu M.Misael, Deputy DEO, District Election Official, Political Party aiawh leh venhim hna thawktute an tel a ni.