771/2023-2024

Aizawl the 12th June 2023: Vawiin khan Power & Electricity Minister Pu R. Lalzirliana chuan 132 KV Sub-Station, Kaihlet, Melriat tlawhin, Department ram leh Vantlang ram inthlengpui tura VC leh NGO Melriat te dilna chu a hmunah tlawhin a enfiah a. Minister hi Prof. F. Lalnunmawia bialtu MLA leh P&E hotuten tawiawmin Melriat khawtlang hruaitu VC leh NGO hrang hrangten a hmunah hian an lo hmuak a ni.

Minister chuan sawrkar chu mipui tana ding a nih ang takin mipui hamthatna turah chuan theihtawp a chhuah thin tih a sawi a. Melriat khawtlang ten 132 KV Sub-Station a thawktute chenna (staff quarters) tur atan ram an lo pek tawh chu sawrkarin a theihnghilh lo tih tarlangin sawrkar pawhin khawtlang mipui chungah lawmthu a sawi nawn a ni, a ti. Vantlang mamawh em em infiamna hmun tur (playground) an neih theihna tur atana 132 KV ram leh khawtlang ram inthleng an dil chu sawrkarin a ngai pawimawih hle a, chutih rualin Cabinet pawmpuina a ngaih avangin khawtlang mipuite chu dawhthei taka lo nghak hram hram turin a ngen. Cabinet meeting-ah theihtawpa bawhzui tur leh a hlawhtlin ngei a beisei thu khawtlang hruaitute a hrilh a ni. Khawtlang tana tha, tangkai leh chhawrtlak hmasawnna thlen chu sawrkar duh ber a ni tih sawiin Pu R. Lalzirliana chuan Melriat khawtlang mipuite chu beiseina nen a lo nghak turin a ngen a ni.

Prof. F. Lalnunmawia bialtu MLA chuan Melriat khawtlangin infiamna hmunhma tha an mamawh hle tih a hriatpui tih sawiin, a hlawhtlin ngei theih nan theihtawp chhuaha hmalakpui a tum thu a sawi bawk a ni.

Attachment

  • Loading attachment...