769/2023-2024

Aizawl, the 12th June 2023 : Vawiin khan School Education Minister Pu Lalchhandama Ralte hovin Hnahthial-a DIET dinna tur ram thlirho a ni.

Hnahthial-a DIET dinna tur ram hi Hnahthial chhehvelah a thlawna ram pe phal an awm thu dawn a ni a, mi 5 ten Hnahthial leh a chheh velah ram, DIET building sakna atana ram an pek phal te, Hnahthial DEO ten drone hmanga thla an lak chu DEO office-ah thlirho a ni.

Minister chuan tunlai khawvelah ram a hlut teh lul nen a thlawna pe phal chhungkaw panga lai an awm chu lawmawm a tih thu a sawi a, zirna atana an inphalna chu hlu a tih thu a hrilh a ni. DIET hmun atana mi inphal ten ram an pek phal chu khawi ber nge remchang ber ang tih khawtlang hruaitute nen sawiho zui a ni a, Hnahthial khawpui than zel dan tur te, Hnahthial atanga a panna remchangte sawiho zui a ni.

DIET building sakna tur hi Samagra Shiksha hnuaiah Project Approval Board-in a pawm vek tawh a, a sakna tur pawh cheng nuai 437 pawm fel tawh a ni.

Minister hian Hnahthial atang hian Siaha a pan nghal a, Siaha a pannaah hian Sangau khawtlangin Sangau VC house kawtah lo lawmna hun an hmang a, Minister chuan amah dawngsawngtute hnenah thusawiin Higher Secondary School Science zirna Sangauah hawn thar a nih tur thu a sawi. thalaite chu LESDE in Siahaa Job fair a buatsaih lo ngaihven turin a sawm a. Zirlai kalkhawmte chu thiamna Pathianin a pekte tipunga taimak chhuah turin a sawm bawk. Minister chuan tun lai khawvelah inelna a sang tawh tih sawiin he inelna karah hian dam khawchhuak thei turin a fuih a,  Mizo hnam tan chhenfakawm ni tura an theihna hmang tangkai tur leh an zirlaiah tuar chhelna nei turin a fuih bawk. Zirlaite chu ruihtheih thil leh zuk leh hmuam laka inthiar fihlim turin a chah bawk a ni.