Vawiin khan Champhaia Faina Hapta 2019 hman mek kharna hun I&PR Auditorium CHANEM Building-ah neih a ni a, he hunah hian Champhai Bawrhsap  Dr. Naveen Aggarwal, IAS chu khuallian niin faina kawnga titha thlanchhuahte hnenah lawmman a sem a ni.

Khuallian  Dr. Naveen Aggarwal chuan Mizoram chu ram mawi tak hmun dang atanga lokalte tan pawha ngainatawm tak a ni, a ti a.  Mizo mipuite inthununna chu entawntlak a tih thu leh abik takin faina leh traffic dan zawm chungchanga mipui mimir khawsak phung chu fakawm a ti a.  Chenna In, Dawr leh a chhehvelte neitu thinlung pu chunga fai taka enkawl anih dante leh khawtlang huapa faina kawnga  hmalak ani lehzelte chu midangte tana entawn tur atana duhawm tak a ni, a ti a. Bawrhsap chuan inthlan laia lungawilohna lantir ten an chetvelna hmunhmate an thianfai leh mai te kha fakawm a tih thu leh chhuang taka hmundanga mite hnena a hrilhhriat thu a sawi bawk.

Dr. Naveen Aggarwal chuan khawchhung cheimawi leh thenfai kawnga Biate leh Champhai District chhunga khaw dangte hmalakna chu fakawm a tih thu leh hmuh chang te hian India ram nilo ram dang daiha awm angte a a inhriat theih hial thu a sawi a. Faina chu hun bik nei leh  tawpsan mai tur thil ani lo a ni tiin,  tun aia nasa zawka nunpuia hmun tina kalpui tur a ni, a ti a.  Champhai District mipuite chu faina bansan mai lova nunpui zel tura fuihin, kalna a piangah   chhawmnung zel turin a chah nghal a ni.  

He hunah hian Faina hapta puala intihsiakna hrang hrang lawmman sem nghal a ni a. Veng fai intihsiaknaah  Vengthlang North chu pakhatna an ni a, Pahnihna Hmunhmeltha niin, Kahrawt Veng chu pathumna an ni a. Heng bakah hian Veng hrang hrang 15 te hnenah Consolation Prize semchhuah a ni bawk. District Research Office, Champhai chu Pisa fai berah thlan a ni a, District Court Champhai chu pahnihna niin, SDO Champhai Power Sub-Division chu pathumna an ni.

Sikul fai inelna huanga lawmman sem niin, Primary School-ah Govt.  Primary School-VI, Champhai  pakhatna an ni a, Govt Tlangsam Primary School-II pahnihna niin, Govt.Primary School-I, Champhai chu pathumna an ni a.  Middle School-ah PES Vengthlang chu fai berah thlan a ni a, Govt. Tlangsam Middle School pahnihna niin, Govt. Vengthlang Middle School  chuan pathumna an hauh bawk. High School fai inelnaah Pinehill Adventist Academy chu pakhatna niin, Govt. Champhai High School leh Bethel Mission School-ten an dawt a.   Higher Secondary School zingah Champhai Higher Secondary School fai berin, Champhai South Higher Secondary School leh Govt. GM Higher Secondary School ten an dawt ve leh a ni. Restaurant-ah New Taste Restaurant, Venglai chu pakhatna an ni a, BSP Restaurant Vengthlang chu pahnihna niin,  Gilgal Restaurant Venglai chu pathumna an ni.

Veng fai inelna huanga pakhatna hian lawmman pawisafai  Rs 20000/- + Citation an dawng a, Pahnihnain pawisafai Rs 15000/- + Citation, Pathumnain pawisa fai Rs 10000/- + Citation an dawng a. Heng bakah hian Veng 15 te hnenah Consolation Prize  Rs 5000/-  pek vek an ni a.  Inelna huang dang zawng zawnga Pakhatna theuhte hian pawisafai Rs 5000/- + Citation, Pahnihnain Rs 3000/- + Citation leh Pathumna theuh ten Rs 2000/- + Citation an dawng vek a ni.

Faina Hapta kharna hun hi Pu K.Lalhmuakliana, DUDO Champhai chuan a kaihruai a,  Category hrang hranga endik tur a ruat ten endikna tehkhawng leh faina hapta chhunga endikna kalpui anih dante an tarlang a, faina kawnga Champhaiin hma  sawn  thu  leh nasa zawka tan lakzel angaih thu an tarlang  hlawm a ni.