No.2501/2021-2022

Aizawl, the 6^th October, 2021: October ni 2 atanga ni 8 thleng awh tur Faina Hapta-2021 Mizoram  puma  hman mek chu Champhai District-ah pawh ngawrh taka kalpui mek zel a ni a, Champhai leh Farkawnah te faina hapta chhunga hmalakna tur indawt dan District Level  Cleanliness  Week Celebration  Committee-in a duan angin hapta hi kalpui a ni.

Faina Hapta hi October ni 2, 2021 khan Champhai District Bawrhsap chuan CHANEM Building-ah a hawng a. Hemi hnu hian hapta chhunga tihtur bituk leh ruahmanna duante chak taka kalpui chhoh zel a ni. Faina hapta neih chhung hian PA System leh Local Media-te kaltlangin faina kawnga inzirtirna neih  a ni a. Chenna in leh a chhehvelte, Sawrkar Pisa leh Biakin-te tihfai a ni a. Vawiin khan faina hnatlangpui leh faina kawnga dan siamte khauh lehzuala kenkawhna ni No Tolerance Day hman  a ni.

Faina hnatlangpui kaltlang hian veng hrang hrang leh pawl bik ten hnatlangpui an nei a. Tukin khan District Transport Office Champhai hmalaknain Champhai khawpui chhunga lirthei khalha eizawngtu pawl hrang hrang ten faina hnatlangpui an nei a. ZDU (207/Pickup, 407, TATA Ace, LPK Truck Owners Association) member ten Khankawn-Zotlang inkar thenfai hnatlang an nei a, Champhai  District Taxi Owners Association member ten New Champhai kawn atanga Helipad thleng an thianfai a, Champhai District Auto Rickshaw Owners Association member  ten New Champhai kawn atanga Zotlang phai thleng an thian fai bawk.  Heng bakah hian Champhai khawpui chhung leh Town Area huam veng hrang hrangahte faina hnatlangpui hi neih a ni.

Vawiin vek khan faina hapta pualin faina kawnga  dan siamte khauh lehzuala kenkawhna ni No Tolerance Day hman a ni a, Champhai Solid Waste Management Bye-Laws, 2020 in a tarlan ang leh thuneihna a pek angin Police, UD&PA thawktute leh Swachh Bharat Mission-Urban Brand  Ambassador-a ruat ten he dan hi khauh takin an kengkawh a, dan bawhchhia mi  20 man niin an pawisa chawi tlingkhawm zat hi Rs. 6,000/-  a ni.

Faina hapta neih chhung hian Champhaiah fai endikna leh inelna buatsaih a ni a. Sawrkar Pisa leh Sikul fai endik turin MJA Champhai District, Veng fai endik turin Sub-Hqrs. YMA, Restaurant, Hotel, Hospital leh Bazar fai endik turin Sub-Hqrs. MHIP te chu ruat niin, endikna hi ngawrh takin an kalpui chho mek zel a ni. Faina kawnga hmalakna leh inzirtirna kalpui tha nitin chhuak Chanchinbu lawmman siam a ni a, faina thupui thlan hmanga Mass Photography Competition buatsaih a ni bawk. October ni 8, 2021 Zirtawpni hian faina hapta kharna hun leh Social Media kaltlanga pholanna hun neiha hmawrbawk a ni ang.