No.2502/2021-2022
Aizawl 6th October 2021: Vawiin khan Fairelbel Utilization Committee chu an chairman, Dr Lalhriatzuali Ralte, Deputy Commissioner hovin DC Conference Hall-ah an thukhawm a. Fairelbel Charity Fund a sum tlingkhawm a thawhhnihna atan AMC huamchhung veng hrang hranga Covid-19 avanga miharsa zual chhawmdawl dan tur an rel a ni.
He hunah hian YMA kaltlangin mi Covid-19 avanga harsatna leh ei leh bar zawn kawnga mi harsa mi 46 hnenah Rs 3,80,000/- hlan an rem ti a, Social Welfare Department kaltlangin pian phunga rualbanlo mi 3 hnenah Rs 30,000/- hlan remtih a ni bawk a. An ni bakah hian Zoram Medical College, Falkawn-a mi harsa enkawlna senso bill pe theilo, Rs 2,37,625/- rulhsak chu pawm tlan a ni a; Fairelbel Organizing Committee-in mi harsa zual mi pahnih hnenah Rs 20,000/- hlan an rawtna chu uluk taka ngaihtuah a nih hnuin, Fairelbel Utilization Committee chuan hlan ni se tih a rem ti bawk a ni.
ZMC Poor Fund-atan Rs 2,00,000/- pek ni se an ti bawk a, ZMC Poor Fund-ah hian mi inphal ten damlo harsa tak tak inenkawlna atan sum remchan dan ang angin an thawh theih reng bawk a ni. Heti hian a thawhhnihna tan Fairelbel Charity Fund atangin Rs 867,625/- chu hun remchang hmasa berah semchhuah leh rem tih a ni.
Chairman Dr Lalhriatzuali Ralte chuan Fairelbel Charity Fund atangin Mizo nunze mawi, midang tanpui duhna leh midang tana thilpek duhna a lo lang zel a, Covid-19 hripui leng karah midangte tana inpekna thinlung a rawl alh chhuak chu ropui a tiin, a petu te zawng zawng chungah lawmthu a sawi a ni.
