Vawiin chawhnu khan Birds Eye Chili - I leh Ginger –I, Farmers Producers Organization (FPO)-te puala sak  Office hawnna hun District Agriculture Office Conference Hall, Champhaiah neih a ni a. Office thar hi Pu James Vanlalluaia, Project Director, Agriculture Technology Management Agency (ATMA), Champhai District  chuan a hawng a ni.

Pu James Vanlalluaia chuan FPO chu Mission Organic Mizoram, Aizawl rem tih puina a din anih thu sawiin FPO kalphung leh din a nih dante a  sawi a. Champhai District chhungah Birds Eye Chilli chingtute tan FPO pahnih a awm  thu leh  Sawhthing chingtuah pawh FPO pahnih a awm mek a ni, a ti a. Champhai District chhung khaw 40 a loneitu 2,138 enkawlna hnuaiah ram Hectares 1145.2 a zauah Sawhthing leh Mizo Hmarcha te chin mek a ni, a ti a. Hengte hi MOVCD-NER Scheme hmanga kalpui vek niin  Organic vek a chin niin NPOP kaihhruaina zulzuia hmalak vek a ni, a ti bawk. 

Agriculture Technology Management Agency (ATMA), Champhai District chu heng hmalakna puibawmtu leh zirtirna petu ber niin an hmalakna hi Champhai District RD Block paliah kalpui mek zel anih  thu a tarlang a. FPO zawng zawngte chu Firm and Society Act hnuaia Register vek an nih bakah Company Act hnuaia hlan chhoh thuai tum a ni, a ti a. FPO te chu loneitute tana hlawk tak a hna thawk tur leh chhenfakawm an nih theihna atan duhsakna a hlan a ni.

Pu H. Lalhmangaiha, Chairman, Birds Eye Chilli-I, Farmer Producers Organization (FPO)  chuan Office thar hawnna hi a kaihruai a. Programme zawh hnu hian General Body Meeting neih chhunzawm a ni a. Pu C.Lalhriatpuia, Chief Executive Officer (CEO), FPO-in thu chah tawi a sawi a. He hunah hian Champhai District FPO hnuaia FIG zawng zawngte an tel a, tlaiah chaw hlui an kilho nghal a ni.