Vawiin khan Champhai District Immunization Task Force Committee chu an Chairman Pi Lalsangpuii Hmar, District Bawrhsap ni bawk hovin DC Conference Hall, Keifangtlangah an thukhawm.

District Immunization Task Force Chairman Pi Lalsangpuii Hmar chuan hun tam a awm tawh loh avangin thahnemngai taka Line Department hrang hrangte chu an hmabak a an mawhphurhna awmte hlenchhuak turin leh tumah hmaih loa chak taka ruahmanna kalpui anih theih nana thawkho zel turin a chah a ni.

He hunah hian April ni 16 atanga neih tan tur Measles-Rubella (MR) Vaccination kalpuina tura hmalakna hrang hrangte thlirho a ni a. MR Vaccination hi District chhunga naupang thla 9 atanga kum 15 inkar mi 40,461 hnena pek tum a ni a. Vaccine-te a chhiat mai lohna tura vawn that dan tur leh mamawh angte hmuh anih theih dan turte bakah harsatna thleng theite sawiho a ni bawk.

Heng bakah hian Intensified Pulse Polio Immunisation (IPPI) hnuaia kum 5 hnuai lam naupangte hnena Zeng hri danna Vaccine pek thawhkhatna February thlaa neih zawh tak ennawn  niin naupang 13,723 hnenah Zeng hri danna pek a ni a. A thawhhnihna tun March thla chhunga neih meka hnathawhte zirchianna neih a ni bawk.

Meales Rubella (MR) Vaccine hi April ni 16, 2018 atanga pek tana ni 30 chhunga District chhunga naupang thla 9 atanga kum 15 inkar zawng zawngte pek vek tur a ni a. A tir hapta hnih chhung chu zirna in zawng zawngah pek tur niin, a dawt hapta hnih chhung chu vantlang/khawtlangah kalpui a ni ang a. A tawp hapta khatah chuan a pek hmaih palh awmthei venthawn nan thual nawnna Sweeping phase neih tur a ni ang.

Vaccine pekna tur atana thawktute inbuatsaihna pawh kalpui nitawhin District chhunga RD Block hrang hrangah Damdawi lama thawktute tan Training  leh  School Principal/Headmaster-te tan Sensitization Workshop-te pawh  buatsaih a lo ni tawh bawk a ni. MR Vaccination hlawhtlin theihna tur hian hian State Level, District level leh Block Level Committee-te a awm leh a ni.

India ram hi khawvela Sentut (Measles) za zela 36 awmna ram a ni a. Nuaibo anih theih nan hmalakna chak taka kalpui niin phase hnihnaah India rama naupang  za zela 29 tuam tawh niin Mizoram chu Phase thumna hnuaia tuam tuma hmalakna kalpui mek a ni. Kum 2020 ah chuan India ram chu he natna awm tawh lohna a siam tum a ni. He natna vang hian kum tin naupang 50,000 vel thi ziah anga chhut a ni. He Measles and Rubella Vaccination hmalakna hi khawvela Public Health Programme lian ber tur a ni.

Vawiina Meeting-ah hian Dr R. Lianmawia, District Immunization Officer (DIO) in hmalakna hrang hrang leh hnathawh zel dan turte  sawifiahna a nei a. He hunah hian District chhunga Health Deparment Office hrang hranga Officer-te, line department hrang hranga hotute an tel a ni.