3683/2024-2025

Champhai, 6th January 2025: Vawiin khan Champhai DC Conference Hall, Keifangtlangah Special Summary Revision behchhana buatsaih Final Electoral Roll chu Champhai Bawrhsap Pu VL Remliana chuan a tlangzarh.

Pu VL. Remliana chuan Champhai District Final Electoral Roll, 2025 a hun taka peih fel tura nasa taka thawk tu DC Election Branch, ERO, AERO, BLO te thahnemngaihna leh thawhrimna chu fakawm tiin an chungah lawmthu a sawi a. Inthlan hlawhtling tak nei thei turin Electoral Roll dik leh felfai kan neih hmasak phawt a tul thu a sawi a. Champhai District-ah sawrkar leh tlawmngai pawl te thawhhona zarah Electoral Roll hearing felfai tak an nei thei chu lawmawm a tih thu a sawi bawk a ni. Champhai Bawrhsap hian kal khawmte atanga zawhna awm te a chhan hnuah Final Electoral Roll a tlangzarh a, Party tin aiawh te hnenah a sem chhuak nghal a ni.

Final Electoral Roll-a tarlan a nih danin, Champhai District-a Assembly Constituency 3 (Champhai North, Champhai South leh East Tuipui) ah polling station 84 awmin vote nei mi 58,657 an awm a, an zingah mi 28,594 chu mipa niin mi 30,063 te chu hmeichhia an ni thung a, mipa aiin hmeichhia 1,469 in an tam zawk a ni. Draft roll tihchhuah hnuhnung ber aiin vote 945 in final electoral roll ah hian vote nei an pung a, mitthi leh awmhmun sawn bakah awm nawn avanga vote paih 930 an awm a ni.

23 Champhai North Assembly Constituency ah hian polling station 30 a awm a, vote nei mi 20,427 awmin mipa 9913 leh hmeichhia 10,514 an ni a, vote nei thar 277 an awm a, vote nei thar hi za zela 1.37 an ni.

24 Champhai South Assembly Constituency ah polling station 25 an awm a, vote nei mi 22,208 awmin mipa 10,583 leh hmeichhia 11,625 an ni a, vote nei thar 441 an awm a, vote nei thar hi za zela 2.03 an ni.

25 East Tuipui Assembly Constituency ah polling station 29 a awm a, vote nei mi 16,022 awmin mipa 8098 leh hmeichhia 7924 an awm a, vote nei thar 227 awmin vote nei thar hi za zela 1.44 an ni.

23 Champhai North leh 24 Champhai South Assembly Constituency ah mipa aiin hmeichhia an tam zawk a, Polling Station voter tamna ber chu Champhai Vengthar niin voter 1,388 an awm a, voter tlemna ber Keifangtlang PS-ah voter 78 an awm ve thung a ni. Kum 18 atanga kum 19 inkarah vote nei mi 2,723 an awm a, kum 20 atanga 29 inkarah vote nei mi 15,456 an awm a, kum 30 atang 39 inkarah vote nei 14,359 an awm a, kum 40 atang 49 inkarah vote nei mi 11,057 an awm a, kum 50 atanga 59 inkarah vote nei mi 6,978 an awm a, kum 60 atang 69 inkarah vote nei mi 4,839 an awm a, kum 70 atang 79 inkarah vote nei mi 2,333 awmin kum 80 chunglam ah vote nei mi 912 an awm bawk a ni.

He hunah hian Pu Ngulzathuama Election Officer chuan Final Roll tlangzarah sawifiahna neiin Electoral Registration Officer, Pu James Lalnithanga pawhin thu sawiin Electoral Roll a luh diltu ten form uluk taka an fill-up a tul tih a sawi a. He mi kawngah hian BLO, khawtlang hruaitute leh political party te thawhpuina a ngen a ni.

Vawiinah Final Roll tlangzarahna hian Sawrkar Officials, Party aiawh leh Ngo hruaitute an tel bawk ani.

final eroll abstract.pdf